مرسته     |     دپاڼي نقشه     |     ننوتل
دخپریدو نیټه : 2014-07-25   مخپرونکئ : 098 - دبېنوا اداره - کابل

غزل

عبدالباري جهاني



پردغه لار چي یو روان منزل ته نه رسیږو
ملګرو پریږدی دا کاروان منزل ته نه رسیږو
دلته تر دار پوري ګامونه په لمبو کي نه ځي
موږ د منصور او د جانان منزل ته نه رسیږو
یارانو پریږدی د ساحل او د امان خیالونه
په سترګو وینمه توپان منزل ته نه رسیږو
لکه اورنګ توره مو سره ده د خپل ورور په وینو
راته په قهر دی اسمان منزل ته نه رسیږو
راته شهید په خپلو وینو دی وصیت لیکلی
څو چي اغیار وي نګهبان منزل ته نه رسیږو
اوس خو واعظ او ملا دواړه بیګانه ښکاریږي
پردی منبر پردی آذان منزل ته نه رسیږو
د انصاف ونه مو په خپلو وینو وروزله
لا ملامت یو د جهان منزل ته نه رسیږو
چي ملالۍ مو په پردیو کي پلو ګرځوي
اوس به څه وايي شهیدان منزل ته نه رسیږو
جهاني تا چي اوربلونو ته غوټۍ روزلې
په باغ دي کښیوتل زاغان منزل ته نه رسیږو.

 

Answer Machine : + 1 (518) 5577770   --   USA Tel : +1 20 38 202020   --   AFG Tel : + 93 (786) 909000  --   Director Email : khalid_hadi@hotmail.com   --   Editor Email : rahila.jawad@gmail.com
Benawa.com    Copyright ©   2004-2018   All Rights Reserved     Powered by:Benawa Network     Design by: Khalid Hadi Hiadery