مرسته     |     دپاڼي نقشه     |     ننوتل
benawa-etisalat
دخپریدو نیټه : 2014-11-24   مخپرونکئ : 098 - دبېنوا اداره - کابل

د بې وسۍ د انتها په لار کې ودریدمه/

 

د بې وسۍ د انتها په لار کې ودریدمه

ته رانه لاړې او زه ستا په لار کې ودریدمه

تر دغه ځایه چې راتلم په پټو سترګو راغلم

تر دغه ځايه زه بیا بیا په لار کې ودریدمه

د وخت له ډېرو تاړاکونو نه راتېر شومه خو

خدای خبر ولې د بلا په لار کې ودریدمه

تا ټولولې او شمال به خورولې زلفې

زه له مجبورې د هوا په لار کې ودریدمه

ما په دې ښار کې څومره ډېره مینه وشیندله

زه په دې ښار کې د هر چا په لار کې ودریدمه

ورته مې هسې وې، یو ورځ به دې مړوند نیسمه

ته وايې زه ورته ريښتیا په لار کې ودریدمه

 

د ایمل مړوند دا له موسیقیته او ښکلا مالامال غزل نقیب احمد اتل په خواږه غږ دومره ښکلی  ترنم کړ، چې د میدیوتیک په تالار کې یوازې ناستو کسانو ته يې د رنګینو خومارونو د باران احساس کیده.

د ختیځ ادبي بهیر دا غونډه د دیدار ساپي لخوا د سپېڅلي قران د څو مبارکو ایاتونو په خواږه تلاوت پیل شوه، میلمه يې قومي مشر پښتون مومند او کوربه نقیب احمد اتل و.

دا ځل د کرکتنې پر ځای د غونډې مشر له بلغاریا راغلي لیکوال اوشاعر استاد اسدالله اسد ته بلنه ورکړل شوه، چې د فرهنګي ژوند تجربې له بهیروالو سره شریکې کړي.

استاد د ۳۰ کالو پخوانیو بنډارونو خوږو کیسو او ځينو ښو او بدو خاطرو د یادولو ترڅنګ ځوانانو ته سپارښتنه وکړه چې د بدبختیو نه د وتلو لپاره هنر ته ډېر ارزښت ورکړي او په خپلو کې د بې ګټو تعصبونو څخه لاس واخلي.

استاد اسد په هیواد کې د اوسنیو ستونزو په اړه د اوږدو او خوندورو خبرو په پای کې وویل، تر هغې چې سره یو نه شو نو پرمختګ هم نه شو کولی.

دا د ختیځ ادبي بهیر ۱۱۸ مه اونیزه غونډه وه. د تېرې اونۍ راپور ابوبکر علیزي لیکلی و او ایمل مړوند ولوستلو. پر ګزارش د خبرو پیل عزت الله ځواب وکړ، ده راپور ډېر تفصیلي وباله او وړاندیز يې وکړ که یو څه لنډ ولیکل شي نو لوستونکو ته به ستړی کونکی نه وي.

همدا راز ځواب د ګزارش په نوي بڼه د لیکلو غوښتنه وکړه، په خبره يې که د غونډې مهمه برخه په سر کې راوستل شي اوریدونکو یا لوستونکو ته به په زړه پوري وي.

سباوون مشعل بیا په ځينو برخو کې د هغه زیاته کړه، هغه وویل کلمو کارونه ناسمه وبلله او وې ویل، ددې جملې چې زیار د اوږدو خبرو لپاره ودرید او په ویاند يې د نیوکو ګوزارونه وکړل په راپور کې راوړل پکار نه و.

عابد صیب! هم د زیار د اوږدو خبرو او نیوکو ګوزارونه په ګزارش کې د بې خوندې ټکي یاد کړل.

نقیب اتل دا ډول خبرې عقدوي برخورد وباله او د راپور په نوي بڼه د لیکلو پلوی و.

دوست هم د اتل د خبرې په تایید وویل، ادبي ګزارش باید دومره خوږ ولیکل شي چې لوستونکی ورنه خوند وخلي.

پر ګزارش تر خبرو وروسته د ښه لیکوال خوشال خلیل د مور بي بي او د ننګرهار د ښوونکو د زده کړې عالي موسیسې استاد ضیاالرحمان حسرت د کورنۍ د غړو پر مړینه بهیروالو سخته خواشیني وښوده او په ګډه يې هغوی ته دعا وکړه.

ددې ناستې وروستۍ برخه د مینې ستړو او تږو لارویو ته د ګلابي باران شیبه یانې مشاعره وه، چې پیل يې دریځوال کریم بارو په دې مطلع وکړ.

مخ راښکاره نه کړې همداسې په ارمان ښه یم

جانانه تانه مرور تاسره وران ښه یم

 مشاعره د لسګونه ګډونوالو په ښکلو شعرونو دومره وشرنګیده چې د هر یو د زړه د تارونو نغمې يې په شور راوستې او ددغې برخې وروستی شاعر استاد اسدالله اسد و چې د څو غزلو له لوستو وروسته يې ارزونه په دې ټکو پیل کړه.

(( ۳۰ کاله پخوا په ټول افغانستان کې دومره شاعران نه وو، لکه اوس چې یوازې په ننګرهار کې دي.))

ده خوښي وښوده چې د پښتو شعر د رنګینۍ او ښکلا پرمختګ ویني.

دا ناسته د ۱۳۹۳ لمریز کال لیندۍ میاشتې په ۳۰ مه ترسره شوه چې راپور يې جلال جمال لیکه.

په پای کې پرېکړه وشوه چې بله اوونۍ به نقیب احمد اتل د لیک نښو په اړه ادبي درس ورکړي.

۱۲:۱۵ دقیقې وې چې د بهیر ملګرو له یو بل سره خدای پاماني وکړه.

راپور: جلال جمال

mainport spozmai radio ipower
Answer Machine : + 1 (518) 5577770   --   USA Tel : +1 518 3662728   --   AFG Tel : + 93 (786) 909000  --   Director Email : khalid_hadi@hotmail.com   --   Editor Email : rahila.jawad@gmail.com
Benawa.com    Copyright ©   2004-2014   All Rights Reserved     Powered by:Benawa Network     Design by: Khalid Hadi Hiadery