د سند ایالت د پرونۍ چاودنې د مړو شمېر ۵۷ تنو ته ورسېد

د پاکستان دسند ایالت په یوه تکیه خانه کې د چاودنې له امله ۵۷ کسان وژل شوي او۷۰ نور ژوبل دي. پاکستانیو رسنیو خبر ورکړی، چې دا چاودنه پرون غرمه د جمعې د لمانځه پر مهال په داسې حال کې شوې، چې د سند ایالت دشکارپور سیمې د اهل تشیع په یوه تکیه خانه کې تر ۳۰۰ زیات کسان د جمعې لمانځه لپاره راغلي وو. تر چاودنې وروسته د شکارپور او نورو نږدې سیمو په روغتونو کې بیړنی حالت اعلان شوی او روغتیایي ټیمونه د پيښې ځای ته لیږدول شوي وو. ځایی چارواکي وایي چې په دې چاودنه کې ۵۷ کسان وژل او تر ۷۰ پورې ټپي دي چې په مړو او ټپیانو کې ښځې او ماشومان هم شامل دي. د سند ایالت مشر وزیر سید قایم علیشاه ددې پيښې د غندلو ترڅنګ په دې ایالت کې دیوې ورځې ماتم اعلان کړیدی. تیره میاشت د پيښور ښار پر یوه ښوونځی له بریده وروسته چې په ترڅ کې یې ۱۵۰ کسان ووژل شول، دا دویم خونړی برید دی.