صبغت الله عاطف
له ناولونو او شعري ټولګې وروسته دا نن راډیو د پیاوړي همکار ځوان ژورنالېست ، لېکوال او شاعر شکور الرحمن حمیدي د ټپیزو ټولګه ده چې ( زما قسمت کې جانان نشته) تر نوم لاندې خپریږي.
د ټپیزو دغه ټولګه ۷۷ مخونه لري ښایسته شین رنګ یې د پوښتۍ کشکش زیات کړی دی د ټولګې پر لومړي مخ د یوې نجلۍ انځور کښل شوی چې معصومه څېره یې کتوونکی شېبه له ځانه سره ساتي.
د پوښتۍ پر دوهم مخ د ښاغلي حمیدي له انځور سره جوخت د دوو خوږو ټپیزو لیکل لوستوونکی اړ کوي چې د کتاب نورې پاڼې هم د نظر په هنداره کې ننداره کړي.
د ټپیزو له طلایي کرښو لوستونکی د مینې ، عاطفې ، حماسې او نورو ټولنیزو مسایلو اخیستنه کولای شي.
د لېکوالو له انده له زړه راوتې خبرې زړونو ته لارې کوي.د ښاغلي حمیدي له دې ټپیزې اورېدو به تاسو ته هم روښانه شي .
د زړه قرار د چا مړ مه شه
خلکه! د لدار د چا مړ مه شه
ښکلی نګار د چا مړ مه شه
همزولی یار د چا مړ مه شه
همزولی یار د زړګي ولې پرې کوینه
حمیدي د ټپیزو په خپله نوې ټولګه کې د پښتني ټولنې ځینې بد رواجونه هم د شعر په خواږه ژبه غندلي دي.
څوک به د باغ ګلونه ستایي
څوک قیمتي لعلونه ستایي
څوک به د بل کورونه ستایي
چې خویندي کیني وروڼه ستایي
وروڼه چې کیني خویندې بل ته ورکوینه
زما قسمت کې جانان نشته د ټپیزو په ټولګه باندې د لېکوال ، شاعر او ژورنالېست دوکتور نجیب الله جالب له خوا لنډې خبرې هم لیکل شوي.
جالب د خپلې لیکنې په یوه برخه کې لیکي : دا چې حمیدي صیب د نثر په برخه کې خپل قلم روان ساتلی خو په څنګ کې ورسره شاعري هم کوي چې تاسو به یې د شعر په برخه کې ګله ګلاب مې ګل ته یوسه شعري ټولګه لوستي وي دادی دا ځل حمیدي صیب په دې هم بریالی شو چې د ټپیزو ټولګه هم وړاندې کړي.
جالب لیکي : د حمیدي صیب ټپیزې مې ولوستې زیاتې مې خوښې شوې چې د موضوع تسلسل ، تړاو ، او منطقي ترتیب ته پکې ډېر پام شوی دی.
د یادولو وړ ده چې ښاغلي حمیدي له دې وړاندې هم د نثر او شعر په برخه کې پنځونې کړې دي.
چې له دې لړ څخه زما مینه شهیده شوه ناول د لس زره ټوکو په تعداد چاپ ، د اوو وروڼو خور که د اختر غوا ناول د دوه ویشتو زرو ټوکو په تعداد تر لوستونکو رسیدلي دي.
زما قسمت کې جانان نشته د ټپیزو ټولګه مینوال او لوستوونکي د ښار له ټولو کتاب پلورنځیو څخه ترلاسه کولای شي.
