وانټ وایګل ولسوالي بېرته افغان ځواکونو نیولې ده

د نورستان والي حافظ عبدالقیوم وایي چې دولتي ځواکونو پرون مازیګر مهال د وانټ وایګل ولسوالي بیرته نیولې ده. تر دې مخکې پرون سهار سلګونو وسلوالو طالبانو د ډله ییز برید په ترڅ کې دغه ولسوالي نیولې وه. د نورستان والي حافظ عبدالقیوم وايي ولسوال او نور دولتي ځواکونه د ولسوالۍ ودانې ته رسیدلي او په سیمه کې چاڼیز عملیات پیل شوي دي. د وانګ وایګل ولسوال رحمت الله وايي چې دی پخپله ولسوالۍ ته رسیدلی او دافغانستان ملي بیرغ یې یو ځل بیا پر ولسوالۍ درولی دی. نوموړی وایي چې تر اوسه یې د څلورو پولیسو جسدونه موندلي او ۱۷ هغه پولیس چې نادرکه شوي وو، بیرته له دوی سره یو ځای شوي دي.