میرویس جلالزی
د خوست ولایت اوسیدونکي وایې چې دغلته د امریکا هیواد او افغان دولت په مالي مرسته د جوړیدونکي هوايي ډګر د جوړیدو چارې چې څو میاشتې دمخه په ټپه دریدلي باید بیرته پيل شي.
خوست وال دمګړۍ د کابل هوايي ډګر بهر ته د تلو لپاره کاروي او کابل ته راتګ ډير ستونزمن بولي.
ویل کیږي چې د خوست ولایت څخه په زرګونو تنه ځوانان دمګړۍ په بهر کې په مزدورۍ لګیا دي چې ډيری یې په عربي ملکونو کې دي.
عربي متحده امارات، کویټ، قطر او سعودي عربستان هغه ملکونه دي چې پکې ډیر خوست وال کاروبار کوي.
ټاکل شوي وه چې دغه هوايي ډګر د امریکې له خوا په لس ملیونه امریکایې ډالره فعال او ترینه ملکي او پوځي الوتنې تر سره شي چې خوست وال دغه کار ته ډير خوشهاله ول.
تر اوسه نه ده څرګنده چې امریکا ولي د دغه هوايي میدان د جوړولو کار ځنډولی دی.
د خوست ولایت اوسیدونکي د هوايي ډګر د پروژې له توقف سره سخت نا امیده شوي او له مرکزي دولت او د امریکې له متحده ایالتونوغواړي چې د دغه هوايي ډګر د جوړولو چارې بیرته پیل کړي.
