مرسته     |     دپاڼي نقشه     |     ننوتل
دخپریدو نیټه : 2017-12-12   مخپرونکئ : 039 - دبېنوا اداره - کابل

د بي بي عایشې (رض) له عالي دارالعلوم څخه سلګونه نجونې فارغې شوې

راحیله جواد


د کابل ښار د بي بي عایشې (رض)  له عالي دارالعلوم څخه ۴۱۳ تنه نجونې فارغې شوې. د دوی له ډلې ۳۸۳ تنه له څوارلسم ټولګي او پاتې ۳۰ تنه له دولسم ټولګي څخه فارغې شوې دي.  دا د یاد دارالعلوم لسمه دوره فارغانې دي، چې ټولنې ته یې د خدمت په موخه وړاندې کوي.

د پوهنې وزارت د اسلامي زده کړو مرستیال ډاکټر محمد شفیق صمیم فارغو شویو نجونو ته مبارکي وویله او د مبارکو احادیثو او ارشاداتو پر اساس یې د علم زده کړه پر نر او ښځه فرض وبلله. ښاغلي صمیم هیله وښوده، چې فارغې شوې نجونې به وطن او اسلام ته د خدمت مصدر وګرځي.

د بي بي عایشې (رض) عالي دارالعلوم په ۱۳۶۸ لمریز کال کې د مدرسې په ډول رامنځ ته شوی، چې په ۱۳۸۶ کال کې دارالعلوم ته ارتقا ورکړل شوې ده. له دې معتبر اسلامي بنسټ څخه تر دې مهاله په لسو دورو کې ۳ زره نجونو د فراغت اسناد ترلاسه کړي دي.

د غونډې په پای کې د بي بي عایشې (رض) د عالي دارالعلوم آمرې مېرمن نظیفې صدیقي ته د ښو خدمتونو په موخه د پوهنې وزارت لخوا د «ملالۍ میوندۍ» مډال ورکړل شو او پر ممتازو زده کوونکو ستاینلیکونه هم ووېشل شول.

Answer Machine : + 1 (518) 5577770   --   USA Tel : +1 20 38 202020   --   AFG Tel : + 93 (786) 909000  --   Director Email : khalid_hadi@hotmail.com   --   Editor Email : rahila.jawad@gmail.com
Benawa.com    Copyright ©   2004-2018   All Rights Reserved     Powered by:Benawa Network     Design by: Khalid Hadi Hiadery