د هوسۍ مجلې پرله پسې لسمه ګڼه چاپ شوه

د هوسۍ مجلې پرله پسې لسمه ګڼه چاپ شوه

د هوسۍ مجلې پرله پسې لسمه (د دويم كال څلورمه ګڼه) په ۱۲۰ مخونو كې له چاپه راووته، چې ۵۰ سرليكه مطالب په كې راغلي دي. لكه څنګه چې دې مجلې په خپله تېره ګڼه كې يادونه كړې وه چې په يوازې سر د چا له مرستې پرته نه شي كولاى چې نورې ګڼې خپرې كړي، له دې كبله له دې نوې ګڼې سره يې ګڼو كلتورپالو او ليكوالانواقتصادي مرسته كړې ده. چې ليسټ يې په دې ډول دى:

هوسۍ مجله اړ ده چې د خپل چاپ، وېش او نورو کارونو لګښت په خپله برابر کړي. په دې برخه كې يې پر ملي كلتور مينو شازلميو هر وخت همکارۍ ته رادانګلي او د دې خپرونې لاسنيوى يې کړى دى.

موږ په خپله تېره ګڼه کې ليکلي وو، چې د هوسۍ نهمه ګڼه په پور چاپوو، دا په داسې حال کې چې اتمه ګڼه مو هم په پور چاپ کړې وه. موږ د ګڼو ستونزو له مخې پرېکړه کړې وه چې نور به هوسۍ نه خپروو، خو زياتو دوستانو ژمنه وکړه چې له هوسۍ سره هر ډول مادي مرستې ته تيار دي. موږ هم د دوى د همدې پخې ژمنې له مخې د هوسۍ لسمه ګڼه هم چاپ ته تياره کړه او هيله ده چې وکړاى شو نورې ګڼې هم پر وخت خپرې کړو.

ښاغلو: محمد بختيار علمي، حاجي عبدالقدير عابد، کامران، رحمت الله قريشي، نوميالي ارين، انجنير غازي خان، انجنير نقيب الله نديم، ډاکټر زرين خان (چې په تېره ګڼه کې يې نوم سهواً ظريف خان ليکل شوى و) حاجي احمدشاه خان او غوث الدين فروتن په ګډه د هوسۍ دې ګڼې ته د ٣٠٠٠ کلدارو مرسته وکړه.

عبدالله احسان په هالېنډ کې د هوسۍ لپاره ځينې ګډونوال راپيدا کړل او د هغوى ګډونونډه يې راولېږله. چې اداره يې په ډېرو مني، بريالى يې غواړي.نومونه يې په دې ډول دي: احمدالله شېري، نجيب احمدزى، هوتك باوري، ممتاز ارمان، عاشق الله غريب، رفېع الله قاضيخېل، عبدالكريم حقانيار او ښاغلي مېلمه، له دوى څخه مننه، چې د  هوسۍ له ګډون سره- سره يې هره ګڼه په مينه لوستلې ده.

ډاکټر محمد الله احمدزي ٢٠٠٠ کلدارې تر هوسۍ قربان کړې، چې دې قربانۍ يې هوسۍ ته نوى ژوند وروباښه.

دغه راز حميد ناصري وردګ له دې ګڼې سره د ۵۰ امريكايي ډالرو مرسته وكړه چې هوسۍ اداره يې د زړه له كومې مننه كوي.

ظاهر خوستي، چې ډېر نېستمن ځوان دى، د هوسۍ ادارې ته ١٠٠٠ کلدارې د بسپنې په توګه ورکړې، دا په داسې حال کې چې نوموړي د اقتصادي ستونزو له کبله تېر کال پوهنتون پرېښود، خو اوس چې له بل چا سره مزدوري کوي، هوسۍ يې هېره نه کړه.

دا دى دا ګڼه د همدغو دوستانو په همكارۍ او مادي مرستې چاپوو، هيله ده په راروان وخت كې وكړاى شو د نورو دوستانو په مرسته نورې ګڼې خپرې كړو. يوځل بيا ټولو ته كورودانى وايو.