د پنجشېر په ابشار ولسوالۍ کې د واورې ښويېدنو له امله دوه کسان مړه شوي او ١٥ نور ژوبل دي، همدا رنګه يو کس په بغلان کې هم خپل ژوند له لاسه ورکړى دى. د پنجشېر سرپرست والي عبدالرحمن کبيري وايي چې د واورې ښويېدنې دغه پېښه تېره ورځ رامنځته شوې چې له امله يې د ابشار ولسوالۍ د استانه سيمې دوه اوسېدونکي له منځه تللي او يو بل ژوبل شوى دى. هغه همدارنګه زياته کړه چې د دې ولسوالۍ په حيل شفي او قل پري سيمو کې هم د واورو ښويېدنو له امله د نارينه وو، ښځو او ماشومانو په ګډون ١٤ تنه ژوبل شوي دي. هغه زياته کړه چې روغتيايي مرکزونو ته د ټپيانو د لېږدلو لپاره ګومارل شوې چورلکه هم تر اوسه په دې سيمه کې د ناستې ځاى نه دى موندلى او ټپيان پر ځاى پاتې دي. بلخوا د بغلان په خنجان ولسوالۍ کې هم واورې ښويېدنې يو تن مړ کړى دى. د بغلان له پېښو سره د مبارزې د چمتو والي ادارې مشر وايي چې دغه واوره ښويېدنې تېره شپه په باجګې دره کې د استوګنې يو کور تر واورې لاندې شوى دى.