چنار
زموږ د کلی زوړ چنار
د نیمګړي عشق کیسه کا
چه په یوه طوفانی شپه کی
دوه مین کړه لاره ورکه
او د تورو له شرنګایی
دی چنار ته پناه راوړه
خو د تورو صاحبانو
د مین د وینو تږي
دا سپیڅلی عاشقان
د چنار غیږ کی پیدا کړل
او نا څاپه درد چیغی
هان هم ورسیدی تر غرونو
د چنار لمنه سره شوه
توره شپه نوره هم شپه شوه
د معصومو وینی توی شوی!
***
دا هماغه زوړ چنار دی
چی تر اوسه نیمه شپه کی
د مینو د درد چیغی
یوناڅاپه کا را پورته
او په درد سره وژاړی
خلک وایی چی پیریان دی
د چنار غیږ کی دیوان دی
خو زه پوه یم چی چنار هم
دغه غم نشی زغملی
د بیوسه عاشقانو
تیر یادونه بیا تازه کا
ها د توری شپی کیسه هم
کلیوالوته ښکاره کا!
مزارشریف ۱۳۹۴