د ارواښاد استاد روهي د لسم تلين لپاره تدابير

څه موده وړاندې خوست مېشتو  کلتوري  ټولنو ، کلتوري مؤسسو  او يو شمېر پوهانو د افغانستان د خوست په ښار کې  په يوه غونډه کې  د دې غوښتنه کړې وه چې د هېواد د نامتو ليکوال ارواښاد استاد روهي جنازه دې چې لس کاله پخوا د امانت په توګه په جرمني کې خاورو ته سپارله شوې وه ، خوست ته انتقال او په خوست پوهنتون کې دې په درنښت سره خاورو ته وسپارله شي . په هغه غونډه کې څرګنده شوې وه چې دا د خوست د کلتوري ټولنو ، قومي مشرانو او د خوست د ټولو خلکو غوښتنه ده .

په دې اړه په تېره اوونۍ کې د جرمني د کولن په ښار کې ،د افغانستان د کلتوري ودې ټولنې او د مونشن ګلاد باخ  افغاني کلتوري ټولنې ګډه غونډه جوړه شوې وه .  په غونډه کې په دې اړه په تفصيل سره خبرې وشوې  ، د استاد د جنازې د انتقال ، دلسم تلين د ياد غونډو او نورو اړونده موضوعګانو په هکله له خبرو وروسته ، دغه پرېکړې وشوې :

١ ـ   د ارواښاد استاد روهي د لسم تلين په مناسبت دې د روان کال د می پر ١٣ نېټه   په جرمني کې د افغانستان د کلتوري ودې ټولنې او په مونشن ګلادباخ کې د افغاني کلتوري ټولنې له خوا علمي  غونډه جوړه او په مونشن ګلادباخ کې د استاد پر مزار دې د درنښت  لپاره د ګلانو توديعي ګېډۍ کېښودلې شي .

٢ ـ   خپل وطن ته د استاد د جنازې د انتقال  ټول لګښتونه به په اروپا کې افغاني کلتوري ټولنې او کلتورپال افغانان په غاړه اخلي . جنازه به د می په نيمايي کې  هېواد ته انتقالېږي .

٣ ـ   موږ  د خوست مېشتو ټولنو او د خوست د قومي مشرانو د هغې پرېکړې بشپړ ملاتړ کوو چې په خوست پوهنتون کې  يې د استاد روهي د جنازې د خاورو ته سپارلو غوښتنه  کړې ده . زموږ په نظر د خوست د  نوي  جوړېدونکي پوهنتون په سيمه کې د استاد د مزار جوړېدل  به ، خوست پوهنتون ته يو بل علمي  ـــ تاريخي وياړ هم ور په برخه کړي .

٤ ـ  له خوست مېشتو ټولنو څخه هيله کوو چې په خوست  پوهنتون کې په درنښت سره د استاد د جنازې د خاورو ته سپارلو لپاره همدا له اوسه چمتووالی ولري . دغه راز به هغوی د استاد د لسم تلين  ياد غونډه هم په پام کې ولري .

٥ ـ   د افغانستان په داخل کې له ټولو کلتوري او ادبي ټولنو او استازيو څخه يې په درناوي هيله کوو چې  د هېواد د يو نه هېرېدونکي ادبي ، ټولنيزاو علمي  شخصيت په توګه ، د استاد د جنازې په مراسمو او ياد غونډه کې برخه واخلي او د هغه ياد د وطن د کلتور او تاريخ  د يوې مهمې برخې په توګه وځلوي .

په درناوي