د پکتیکا ولسونو دیوې پراخې غونډې پرمهال له افغان دولت او امنیتي ځواکونو ملاتړ وکړ.
د پکتیکا ولایت ګڼ شمېر اوسېدونکو دشنبې په ورځ دیوې پراخې غونډې په ترڅ کې د افغان دولت، امنیتي او دفاعي ځواکونو ملاتړ څرګند کړ او په ورته وخت کې یې دسولې فرهنګ د دودولو ژمنه وکړه.
دوی د سرتېرو د تشویق په موخه ددوی په غاړو کې د ګلانو هارونه واچول.
په مراسمو کې د پکتیکا والي محمدالیاس وحدت ترڅنګ، دولایتي شورا غړو، قومي مشرانو، دیني عالمانو، متنفذینو او ځوانانو برخه اخیستي وه.
د پکتیکا ولایت قومي مشرانو د هېواد دبقا او ارامۍ په برخه کې د افغان امنیتي ځواکونو وروستۍ سر ښېندنې د ستاینې او قدر وړ یادې کړې او زیاته یې کړه چې ددوی ولسي ملاتړ به یې همېشه تر څنګ وي.