د پنجشنبې په ورځ په کندهار ولايت مقام کي ولس ته د کلني حساب ورکولو لويه غونډه د سرپرست والي عبدالحنان منيب په مشرۍ ترسره سوه چي پرمهال يې د ولايتي شورا رئيس او غړو، د استناف محکمې او ټولو دولتي ادارو مسؤلينو او استازو، د ولسواليو ولسوالانو، د کندهار ښار او ولسواليو قومي او ولسي مشرانو، مدني فعالانو او په زيات شمېر ځوانانو ګډون کړی وو.
په دغه غونډه کي د سکتوري، کرهڼي، عامي روغتيا، کار او ټولنيزو چارو، فوائد عامې، پوهني او اقتصاد رياستونو رئيسانو د خپلو ادارو اړوند معلومات او لاسته راوړني د فريزينټېشن له لاري ګډون والو ته وړاندي کړه، همدارنګه يې له سرپرست والي څخه هم مننه وکړه چي د دا ډول پروګرام زمينه يې ورته مساعده کړې ترڅو ولس د دولتي ادارو له اجراأتو څخه اګاه سي.
همدارنګه په غونډه کي سرپرست والي عبدالحنان منيب وويل : دا چي ( ۱۳۹۷ ) مالي کال پای ته رسېدلی نو لازمه مو وګڼل ترڅو د ټولو دولتي ادارو استازي د خپلي ادارې اړوند د لاسته راوړنو، اجراأتو او هر اړخيزه معلومات ولس ته وړاندي کړي.
سرپرست والي د دولت مامورين د ولس خادمان او ولس ته د ښه خدمت پر وړاندي کولو باندي مکلف وبلل او ويې ويل : دغه مامورين به د ولس ستونزو ته وخت پر وخت په خپله برخه کي حل لاره ولټوي.
نوموړي زياته کړه : په را روان مالي کال کي هم ولايتي اداره په ښار او ولسواليو کي متوازن انکشاف رامنځته کولو ته ژمنه ده ترڅو ولس ته د اړتيا وړ پروژې تطبيق کړي، نوموړي د هيواد په جوړونه کي د دولت ترڅنګ د ولس همکاري مهمه وبلل ترڅو په هره برخه کي د پروژو د تطبيقولو پرمهال د هغه په ساتنه او امنيت په ټينګښت کي له دولت سره هر اړخيزه همکارۍ ترسره کړي