اوبه خړول او كب نيول

څه موده وړاندې په امريكې كې نيوز ويك نومې مجلې يو خبر خپور كړ چې په هغه كې ويل شوي وو: دګوانتامو په زندان كې د هغه زندان موظفينو د الله(ج) د كلام قرانكريم سپكاوى كړى او يو جلد قرانكريم يې په كمود كې غورځولى دى.
د نيوزويك دې خبر د مسلمانانو قهر راوپاره او په ځينو هېوادونو كې ددې عمل پر ضد مظاهرې وشوې.
افغانانو هم په خپلو مظاهرو سره د ګوانتامو د موظفينو ددې كرغړېړن عمل په وړاندې خپل احساسات څرګند كړل او هغه يې وغانده.
خو كوم شى چې ټولو هېوادوالو ته د خواشينۍ وړ وګرځېده هغه دا و چې يو شمېر فرصت طلبو او د هېواد غير محسوسو او پټو دښمنانو د مظاهره چيانو لـه پاكو احساساتو څخه ناوړه ګټه پورته كړه او دولتي او غير دولتي خيريه موسسې يې تخريب او وسوځولې، چور يې وكړ او د خپلو مخالفتونو غچ يې واخيست او زموږ د مجاهد او پاك ولس په لمن يې داغ كېښود. زموږ ولس دا مهال د يو تاريخي ازماېښت په درشل كې دى، داسې ازماېښت چې تر شا يې يو كنډواله هېواد او مخته يې د سوكالۍ نه چندانې اسانه، بلكې ستونزمنه او اغزنه لار پرته ده. په داسې شرايطو كې زموږ ولس ته په كار ده چې د منزل په لور خپل هر قدم په خورا ځيركۍ او احتياط سره پورته كړي او د خپل حق د تر لاسه كولو لـه پاره د اختناقچيانو او د هېواد د دښمنانو په وړاندې تر سرې كرښې ودرېږي. كه موږ خپل تېر درې نيم كلن واټن ته وګورو او ووايو: هغه څوك وْ چې د ولس غوښتنې يې نه منلې، له څوكيو نه ښكته كېدل او دولتي څوكۍ يې د ملت د ټكولو او د خپلو جېبونو د ډكولو لـه پاره په كارولې، لويه جرګه، اساسي قانون، ډيموكراسي اوانتخابات يې نه منل؟ او غواړي د منطق پرځاى په زور سره پر ولس واك وچلوي؟
او هغه هم معلوم دي چې سوله، آبادي، سوكالي، قانون او د عدالت ټينګول غواړي، هغه لـه ولس نه پرته بل څوك نه شي كېداى. حقيقت دا دى چې هېواد لـه ولس پرته بل هېڅ ډاډمن تضمين د چوپړ او ساتنې نه لري. دا به زموږ تېروتنه وي چې موږ ټول كارونه دولت ته پرېږدو او يا د ټولو نيمګړتياوو پړه پر دولت واچوو. دا به په ملت پورې اړه ولري چې د خپلو دښمنانو په وړاندې ودرېږي او پـــه هېواد كې د عــــدالــــــت او قانون ساتنه وكړي.
ولس په دې برخه كې په كراتو � كراتو خپل رسالت سرته رسولى او زياته تجربه لري، موږ ولېدل چې په تېرو لنډو كلونو كې دوى څنګه وكولى شول، د قدرت فرعونانان لـه څوكۍ وپرځوي، ځانته ولسمشر وټاكي، د نشه يي توكو او ماشومانو د قاچاق مخه ونيسي او داسې نور اوس هم ولس ته په كار ده چې د خپلو ملي شتمنيو، ادارو، قانون او عدالت ساتنه په خپله وكړي او دښمنانو ته دا وخت ورنه كړي چې د دوى لــــه موجوديت او مجبوريت نه ناوړه ګټه پورته كړي او د دوى لمنه داغمنه كړي