په کراچي کي د جهاني په وياړ د ترسره سوي غونډي راپور

په کراچي کي ميشتوادبپالو او فرهنګپالو افغانانو د پښتو د وتلي او ستر شاعر او ليکوال محترم عبدالباري جهاني په وياړ يوه پرتمينه ادبي غونډه د ۲۰۰۷ کال د سپټمبر پر دوهمه د يکشنبې په ورځ په ( رم جهم هال- ګلشن اقبال) کي  جوړه کړه، چي ډېرو لر و  بر پښتنو برخه پکښې درلوده.
 غونډه د ماپښين پر۱بجه ښاغلي الحاج عبدالرشيد هاوند رسماً پرانيسته، وروسته محترم استاد عبدالروف منصف د پاک کلام څو مبارک آياتونه تلاوت کړه.
ورپسې درانه مشر شاعر او ليکوال محترم عبدالهادي ريشاء خپل پيغام او يو ښکلئ شعر واوراوه ښاغلي ريشاء په خبرو کي جهاني صاحب د پښتو  ادب چلچراغ وباله.
وروسته فرهنګپال افغان ښاغلي هاوندصاحب د جهاني صاحب لنډ ژوند ليک او يو شعر ولوست.
همدارنګه خپل په وار سره ښاغلي سيدامين الله امين،ښاغلي يوسف خط زيار، محترم ډاکټر عبدالفتاح، ښاغلي حسن  آغا، ښاغلي عبدالرحيم ريشاء او ښاغلي رحيم مومند خپلي ويناوي او شعرونه وړاندي کړل. او د جهاني صاحب څخه يې کورودانی وکړ .
د غونډي په دوهمه برخه کي د پښتو ادب ستوري جهاني صاحب و تربيون ته راولاړ سو او خپل شعرونه يې په خورا اخلاص سره  واورول  چي د ګډونکونکو په ولولو سره ولمانځل سول.
بيا نو د غرمي د ډوډۍ تر خوړولو وروسته د هنرمند فريد نويد لخوا د جهاني صاحب څو شعرونه د سندرو په قالب کي  وړاندي سول.
په پای کي خبريالانو د جهاني صاحب سره مرکې وکړې.
غونډه د ماښام پر  شپږوبجو پای ته ورسېده.