د بېنوا د ژباړې جايزه وركړل شوه

د بينوا خبريال – مسكو۲۴ر۱۲ر۲۰۰۴

ښاغلي محمد طاهر كاڼي ته د بېنوا د ژباړې جايزه وركړل شوه

د استاد بېنوا د ژباړې جايزه، د يوې ادبي غونډې په ترڅ كې نامتو ليكوال او پياوړي ژباړونكي،  ښاغلي محمد طاهر كاڼي ته نن ( جمعه ) په مسكو كې وركړل شوه.

په دغې ادبي غونډې كې، لومړی ډاكټر جمشيد سمون ته بلنه وركړل شوه، چې د ښاغلي كاڼي د ادبي او فرهنګي هلو ځلو په باب وينا وكړي. وروسته  بيا، د كانديد اكادميسين  استاد محمد انور نوميالي، د ژباړې د ارزښت او اهميت په هكله ارزښتناكې خبرې وكړې، چې د حاضرينو د پام وړ وګرځيدې. بيا استاد امان اشكريز، عمر ننګيار، ځوان شاعر اسد ميوند، افسر سمون، ډاكټر شير حسن حسن او عارف خزان   په خپل وار د ښاغلي كاڼي د ادبي هلو ځلو، د هغه د ژوند د لنډې  پيژندنې او دغه  راز په جرمني كې د افغانستان د كلتوري ودې ټولنې د كار او فعاليت او فرهنګي هلو ځلو په باب  خبرې وكړې.

د غوڼدې په وروستۍ برخه كې د  كانديداكادميسين  استاد محمد انور نوميالي، ښاغلي محمد طاهر كاڼي ته د (افغانستان د كلتوري ودې ټولنې-جرمني) له خوا، د بينوا د ژباړې جايزه، چې  د معنوي ارزښت تر څنګ، پنځه سوه امريكايي ډالر هم ور سره ملۀ و، ورسپارل شوه، چې د حاضرينو له خوا د لاسونو په پړكولو يې تود  هر كلی  وشو.

وروسته ښاغلي محمد طاهر كاڼي هم په خپل  وار د افغانستان د كلتوري ودې ټولنې_جرمني څخه د زړۀ  له كومې مننه څرګنده كړه او ويې ويل چې د دوی په وينا ، زما ناڅيز كار د دومره  لويې او قدرمنې جايزې وړ نه و، خو بيا هم د دغې ټولنې د مشرتابۀ او په مسكو كې دې د نورو دوستانو كور آباد وي، چې زما كار ته په زيات ارزښت قايل شوي دي او نن يې د داسې يې غونډې اهتمام كړی دی.

د غونډې په وروستۍ  برخه كې د افغان د سوداګريز مركز د رييس له خوا د ګلانو ګيډۍ د استاد امان اشكريز له خوا، ښاغلي كاڼي ته وسپارل شوه، چې د كور وداني په ويلو سره و منل شوه.

د غونډې په پای كې د افغان  سوداګريز مركز له رييـس او په مسكو كې د افغان كډوالو د ښوونځي مشرې  ميرمن لادا او د ښاغلي ډاكټر شيرحسن حسن او نورو دوستانو  څخه هم له دې امله  مننه وشوه، چې د دې غوڼدې په سمالښت كې يې فعاله ونډه اخيستې وه.