د عبدالباري جهاني په وياړ مشاعره ( انځوريز راپور)

د بېنوا خبريال

د غويي د مياشتې پر ١١مه نېټه په هلمند ولايت کې د بست فرهنګي ټولنې په هڅو او زيار، د دې ولايت د اطلاعاتو او کلتور رياست په مرسته، دغه راز د هلمند ولايت د مقام او ښاروالۍ په همکارۍ د پياوړي شاعر عبدالباري جهاني په وياړ يوه پرتمينه مشاعره جوړه شوه، چې  د هلمند ولايت پر شاعرانو او ليکوالو سر بېره د کندهار، زابل، فراه او نورو ولايتونو په سلګونو شاعرانو او کلتورپالو هم په کې ګډون کړى و.

په دې مشاعره کې تر ٣٠ زياتو شاعرانو خپل شعرونه ولوستل، چې بيا يې وار په خپله جهاني صاحب ته هم ورکړ، نوموړي هم خپل ډېر شعرونه ولوستل چې برخوالو يې د خپلو لاسونو په پړکا بدرګه کول.

ويندويي يې عبدالصمد روحاني کوله، مشاعره د لښکرګاه ښار په ’کرزي‘ لوبغالي کې جوړه شوې وه، چې د مازيګر پر پنځو بجو پيل او د شپې تر ٩ بجو پورې يې دوام وکړ.

د بست فرهنګي ټولنې غړي عبدالصمد روحاني بېنوا ته وويل چې د دې پرتمينې مشاعرې لګښت د بست فرهنګي ټولنې د غړو او د دې ولايت د والي او ښاروال له خوا برابر شوى و، چې په دې منځ کې د سيمې ملي سوداګرو هم خپله مرسته نه ده سپمولې.

د غونډې په ترڅ کې د بست فرهنګي ټولنې مشر بريالي هلمند عبدالباري جهاني ته پګړۍ هم وروتړله چې د غونډې برخوالو يې په چکچکو هرکلى وکړ.

دا په تېرو څو لسيزو کې د هلمند ولايت په کچه يوه بېسارې مشاعره ده چې جوړېږي، کتونکي په دې باور دي چې د دې ډول غونډو په جوړېدو سره به د سيمې د فرهنګيانو ترمنځ کلتور اړيکي ټينګ او خلک به په خپلو کې ډېره سره نژدې شي. دغه راز خلک خوښي څرګندوي چې اوس مهال دا ډول غونډې اوس په اکثرو ولايتونو کې زياتې جوړېږي، چې دا په خپله يو غوره کار دى.

د عبدالباري جهاني په وياړ دا دويمه ستره غونډه چې په دې وروستيو اوونيو کې جوړېږي، يوه غونډه تېره اوونۍ په کندهار کې جوړه شوې وه، چې هلته هم په لسګونو کسانو ګډون کړى و .

د مشاعرې په پاى کې د يوه وړانديز په توګه ټولو شاعرانو له دولت، په ځانګړې توګه ولسمشر څخه په ټينګه وغوښتل چې په کابل کې دې غلام رسول خوشبخت له بند څخه خوشې کړي، غلام رسول خوشبخت د هلمند ولايت يو ځوان شاعر دى، چې د تېر لمريز کال د تلې له مياشتې راهيسې د کابل په توقيف خانه کې بندي دى.

دغه راز دغو شاعرانو پر دولت دا نيوکه هم وکړه چې پر دومره ځنډ او وخت سربېره يې ونه شول کړاى چې ملي سرود جوړ او تصويب کړي. دوى له دولت څخه وغوښتل چې ژر تر ژره دې ملي سرود جوړ او د پارلمان تر جوړېدو وړاندې دې کمپوز شي.

په پاى کې له نورو ولايتونو څخه راغلو مېلمنو ته ډالۍ ګانې هم ورکړل شوې، د ساري په توګه د زابل ولايت په استازيتوب دواخان مينه پال، د کندهار په استازيتوب جانان مومن، محمد حسن حسنيار، سيد احمد قانع، د وردګو ولايت په استازيتوب غلام سخي نوريوال ته. غونډه د ماښامنۍ تر خوړلو وروسته پاى وموند.