دروڼ اندو برخه او مسوليت دملي شتمنيو په ساتنه کښي

وروستۍ لاريونونه په جلال اباد کښي کوم چه دوژني ، وهلو ټکولو ورانولو سره ملګري وي دهر افغان دپريشانۍ سبب وګرزيدي ، په دي لاريونو کښي حتما دپرديو لاسونه سته ، دا خو په رشتيا دهيڅ مسلمان لپاره دمنلو وړ نه ده چه څوک دقران عظيم الشان سره بي حرمتي وکړي ، دلته څوخبري سته چه په ټوله نړي کښي يوازي په افغانستان  او خصوصا په جلال اباد کښي دتشنج ډک لاريونونه ترسره سول او دافغانانو دوژلو وهلو اوټکولو سبب وګرزيدل ، ډيري دولتي  او غير دولتي ودانۍ وراني سوې . دلته دروڼ اندو ، علماو ، پوهانو او ليکوالو وظيفه ده چه دغه جريانونه په صحيح ډول رهنمايي کړي ، ددوی سره کښيني اولازمي توصيې اولارښووني ورته وکړي ، دراډيو ، ورځپاڼو ، موعظو او مشورو له لاري ددغو احساساتي ځوانانو هيجانات راکنترول کړي او دوی دخرابۍ اوورانۍ څخه وژغوري ، موږ پوهيږو چه دهيواد په هرګوټ کښي ديني علما ، روڼ اندي او ليکوالان سته ، ښه ليکني کوي او دپوره پوهي خاوندان دي ، دا د دوی ملي مسوليت دی چه دخپل اړوند ولايت يا ولسوالي اوسيدونکي دغيرمسولانه اعمالو څخه وژغوري ، دډله ايزو رسنيو څخه خبريږو چه په پلاني ولايت کښي دا ټولنه او ها ټولنه جوړه سوه ، زما په هاند ددي علمي ،فرهنګي او کلتوري ټولنو وظيفه يوازي دانه ده چه غونډي جوړي کړي ،اشعار ووايي ،کيسي وليکی او يو او بل ته چکچکي وکړي ، ودي کړي دا ټول دي وکړي دادوی حق دي ، خو دملي منافعو او ملي شتمنيو په هکله بايد بي تفاوته پاته نه سي ، دا روڼ اندي او علما بايد په هرډول چه وي دځوانانو په صفوفو کښي نفوذ وکړي او ددوی دغير مسولانه کړنو مخنيوی وکړي ،  اکثره سريع او تند عمل ډيردتاوان او خرابۍ سبب ګرزي. داسي ډير پيښ سويدي چه وروسته تر سريع او تند حرکت ترکولو وروسته چه عمل کوونکو پر خپلو کړنو عميق فکر او سوچ کړی دی نو ډيري تيروتني او غلطي يي  پيداکړي  اوبيا پر خپلو کړنو پښيمانه وي ، چه ښکاره مثال يي دجلال اباد لاريونونه دي .  خدای دی وکړي چه زما درانه روڼ اندي او دبصيرت درلوونکي وروڼه زما نه خپه نه سي.