په هالنډ کي د تياتر د ځلانده ستورو يادغونډۀ جوړه شوه

په بېنوا کي دلیکني شمیره : 2853
عبدالله احسان - هالنډ
دخبریدو نیټه : 2005-05-16

دوشنبې د غويي ٢٦مه ( عبدالله احسان )

په هالنډ کي افغاني کلتوري ټولني

د ارواښاد استاد جان محمد پکتا پلار ، او ارواښاد ف فضلي

يادغونډه جوړه کړه

 

د ١٣٨٤ لمريز کال د غويي دمياشتي پر ٢٤مه نېټۀ په هالنډ کي د افغاني کلتوري ټولني له خوا د اوتريخت په ښار کي د هيواد د پياوړي او تکړه استاد خدای بخښلي جان محمد پکتا پلار او خدای بخښلي استاد ف فضلي يادغونډه جوړه شوه .

په نوموړې غونډه کي چي دماځيګر پر اووه بجې پيل او تر لسو بجو روانه وه  په هالنډ کي د يو شمېر فرهنګپالو او فرهنګيانو تر څنګ په بلجيم کي د افغانستان د پوهاوي ، مرستي او پيوستون ټولني ، جرمني کي د افغانستان د کلتوري ودي ټولني ، په اروپا کي د افغاني کلتوري ټولنو د ګډې جرګې تر تر مشرانو او استازو برسېرهيو شمېر ليکولو او د افغانستان د تياتر او سېنما پخوانيو کارکوونکو او مينه والو برخه لرله .

د غونډي چلوونکې د افغانستان د راډيو او تلويزيون تکړه نوميالۍ ويانده ، ليکواله او شاعره اغلې سهيلا اصغري وه .

په پيل کي د  ښاغلي عبدالله نيازي له خوا د قرآن عظيم الشان د څو مبارکو ايتونو په تلاوت  او دعا په ويلوسره پيل غونډه پيل شوه .

ورپسې د افغاني کلتوري ټولني مشر ليکوال او شاعر ښاغلي رحمت ګل ځواکمن خپله  پرانستونکې وينا واوروله ، مېلمنو ته يې ښه راغلی ووايه ، او د ارواښاد جان محمد پکتا پلار او ارواښاد استاد ف فضلي په اړه يې خپله ليکنه ولوستله ، د غونډي وياندي اغلي سهيلا اصغري د خدای بخښلي استاد جان محمد پکتا پلار ژوند ليک ولوسته ، اوښاغلي ذبيح الله انيل د ارواښاد استاد ف فضلي ژوند ليک واوراوه ، او همدا ډول يې د هغه سره د ګډ کار څو خاطرې واورولې .

دغونډي چلوونکې اغلي سهيلا اصغري غونډي ته د بېلابېلو هيوادونو څخه د فرهنګي ټولنو له خوا راغلي پيغامونه ولوستل ، غونډي ته ددغو ټولنواو فرهنګپالو پيغامونه رارسيدلي وو :

د کابل څخه د ښاغلي عنايت صافي پيغام، د افغانستان د سهيل لوېدېځي حوزې د ليکوالواو فرهنګي ټولنو په استازيتوب  دعلامه رشاد بابا ( رح ) د ادبي بهير پيغام، د کابل څخه د هوسۍ مجلې پيغام ، د واشنګټن څخه د ښاغلي غفور لېوال پيغام، په استراليا کي د افغانانو د فرهنګي ټولني پيغام، په انګليستان کي د پښتو ادبي جرګې پيغام ، په هالنډ کي د سلام فرهنګي ټولني پيغام، او يو شمېر نور . . .

په اروپا کي د افغاني کلتوري ټولنو د ګډي جرګې مشر څېړونکي او ليکوال ښاغلي زرين انځور ، په جرمني کي د افغانستان د کلتوري ودي ټولني پيغام د هغې ټولني منشي ښاغلي محمد عاشق غريب  او په بلجيم کي د افغانستان د پوهاوي ، مرستي او پيوستون ټولني په استازيتوب ښاغلي حاجي امين باوري د خپلو ټولنو پيغامونه ولوستل .

په غونډه کي ليکوال ، ژورناليست ، او افغانستان د راډيو تلويزيون پخواني کارکوونکي ښاغلي محمد اصف وردګ د ارواښاد جان محمد پکتا پلار او ارواښاد استاد ف فضلي پر ژوند په تفصيل سره خبري وکړې .

ورپسې  د افغانستان د راډيو تلويز ن  وياند او د اطلاعاتو او کلتور پخواني وزير  ، ليکوال او شاعر ښاغلي خيال محمد کټوازي د ارواښاد ف فضلي په اړه د هغه وخت څو خاطرې يادي کړې . او د هغه د هنري ژوند پر بېلابېلو برخو يې رڼا واچوله .

تکړه ليکګر ، انځورګر او نقاش ښاغلي همايون عاطفي د سېنما ، تياتر ، او تمثېل پر ازرښت خپله مقاله واوروله . د ياودوني وړ ده چي د ستېج شاته ليکنه ، او د ارواښاد ف فضلي پوتريت د ښاغلي عاطفي دلاسي کار بېلګي دي .

تر دې وروسته د هيواد د تياتر او سېنما تکړه ممثلي اغلي ستوری منګل د استاد جان محمد پکتا پلار او ارواښاد ف فضلي د ژ وند په اړه خپله مقاله ولوستله ، او د هغوی سره يې د خپل ګډ کار د وخت د بېلابېلو برخو په اړه مالومات واورول .

ښاغلي ډاکټر سيد نصير احمد د افغانستان د تياتر او تمثيل په اړه يو انځوريز پروګرام جوړ کړی و چي بايد د پردې پر مخ ښودل شوی وا ی ، دا پروګرام د تخنيکي ستونزو له کبله ونه ښودلای شو .
تر تفرېح وروسته د پردې پر مخ د کونډي زوی په سريال کي د ارواښاد ف فضلي د رول څوبرخي وښودل شوې . او تر دې وروسته يو کال مخکي د اغلي ستوری منګل سره د ارواښاد ف فضلي ويډيووي خبري وښودل شوې ،دا ويډيوي مرکه تېر کال اغلي ستوری منګل د کابل د سفر پر وخت د خدای بخښلي استاد ف فضلي سره کړې وه .

دغونډي په وروستيو کي يو ځل بيا ښاغلي محمد اصف وردګ ته بلنه ورکړه شوه چي د ارواښاد استاد جان محمد پکتا پلار او ارواښاد استاد ف فضلي د ژوند پر هغو برخو چي دوی ته مالومي دي وږغيږي .  ښاغلي محمد اصف وردګ د غونډي د برخه والو ځينو پوښتنو ته ځوابونه وويل .

ورپسې اغلي ستوری منګل هم د خپل کار د وخت څو خاطرې د ستېج پر مخ واورولې .

د ټولني د مشرتابه له خوا  اغلي سهيلا اصغري ته د ګلونو د ګېډۍ په ډالۍ کولو سره په غونډه کي د ټولو برخه والو څخه په غونډه کي د هغوی د ګډون څخه مننه وشوه ، او د افغانستان د اسمان د دوو ځلانده ستورو پاکو ارواحونو ته دعا وشوه . 

غونډه د ماخستن پر لس بجې پای ته ورسېده .

 

 ليکوال او شاعر ښاغلی رحمت ګل ځواکمن پرانستونکې وينا کوي

 د راډيو تلويزيون تکړه ويانده اغلې سهيلا اصغري د پلار صاحب ژوندليک لولي او راغلي پيغامونه لولي

 دسېنمااو تياتر لوبغاړی ښاغلی ذبيح الله انيل د استاد فضلي ژوند ليک او يادونه اوروي

 ښاغلی محمد اصف وردګ د تياتر د دوو استادانو (راواښاد پکتا پلار ، او ف فضلي ) خاطرې بيانوي

 ډاکټر سيد نصير احمد دافغان تياتر انځوريزه ننداره چمتوکړې وه .

ښاغلی زرين انځور په اروپا کي د افغاني کلتوري ټولنو د ګډي جرګې پيغام اوروي

 ليکوال او شاعر ښاغلی خيال محمد کټوازی د ف فضلي پر هنري ژوند ږغيږي

 د تياتر او سېنما تکړه لوبغاړې ستورۍ منګل دپلار صاحب او ف فضلي پر هنري کارنامو ږغيږي

 په غونډه کي د هالنډ له دننه او بهر څخه ليکوالو او فرهنګپالو برخه لرله

 ليکګر ، انځورګر او نقاش ښاغلی همايون عاطفي د تياتر پر ارزښت رڼا اچوي

د غونډي يوه څنډه ( ښاغلی محمد اصف وردګ ښاغلي خيال محمد کټوازی او د غونډي نور برخه وال)

 ښاغلی محمد عاشق غريب د افغانستان د کلتوري ودي ټولني پيغام لولي

ښاغلی حاجي امين باوري دارواښاد پکتا پلار او ف فضلي روح ته دعا کوي  

 د غونډي يوه څنډه

د پردې پر مخ د ارواښاد ف فضلي سره د اغلي ستوری منګل مرکه ښودل کيږي 

د سېنما اوتياتر تکړه لوبغاړی  ښاغلی احمد شا بهاندد غونډي جريان ثبتوي

د پردې پر مخ د ارواښاد ف فضلي سره د اغلي ستوری منګل مرکه ښودل کيږي 

 له راستې خوا : د راډيو تلويزيون تکړه ويانده اغلې سهيلا اصغري او د سينما او تياتر لوبغاړې ستوری منګل

 د هجرت سېنما يي فلم لوبغاړي  علي سعيد ، -- ؟ -- همايون عاطفي ، خسرو ، او ذبيح الله انيل

 د ټولني مشرتابه له اغلي سهيلا اصغري له همکارۍ نه مننه وکړه