احمد لودين : کندهار
د نشه ايي توکو سره د مبارزي د عدليي او قضايي مرکز د پلټني او بررسى لوي مدير نورمحمد ځاځي وويل چي دوي د تير کال په ترڅ کي په لسګونه ټنه نشه ايي توکي چي تارياک ، چرس ، هيروين او داسي نور مخدره مواد پکښي شامل دي تر لاسه کړي دي . دده په خبره چي په تير کال کي له بيلابيلو ولايتونو څخه ٣٩٥ قضيي دوي ته رسيدلي او دنشه ايي توکو د قاچاق په تور يي ٥٩٩ تنه نيولي دي چي داستناف محمکي له خوا په سزا محکوم سوي او ٤٩ تنه د موثقو اسنادو د نه درلودولو له کبله بي ګنا پيژندل سوي او خوشي سوي دي . دده په خبره د دوي له کارکوونکو له لوري د نشه ايي توکو سره د مبارزي لړۍ روانه ده او دوي په دي هڅه کي دي چي په افغانستان کي د هر ډول نشه ايي توکو د قاچاق او کرکيلي مخه ونيسي . دده په خبره دوي ته د ځينو لوړپوړو چارواکو په هکله هم معلومات په لاس ورغلي دي چي د نشه ايي توکو په قاچاق کي لاس لري خو تر هغه وخته کوم اقدام نه سي کولاي څو اسناد او شواهد په لاس کي ونه لري .
وروسته د ابتدايي محمکي لوي ريس محمدزمان سنګري وويل چي دوي په تير شمسي کال کي د نشه ايي توکو د قاچاق د نورو لسګونو تورنو کسانو تر څنګ ٣٥ تنه دولتي کارکوونکي او ١٣ تنه بهرنيان چي دنشه ايي توکو د قاچاق په تور نيولي په نولسو کلنو بند او دوه ميليونه نقدو افغانيو جريمه کړي دي .
دده په خبره ددوي د څيړنو له مخي چي کوم اسناد تر لاسه سوي دي نوموړو کسانو هندوستان ، چين ، تاجکستان ، ازبکستان ، ايران ، پاکستان او اسټرليا ته نشه ايي توکي قاچاق کړي دي .
د سنګري په خبره چي په افغانستان کي د ٩٤ قاچاقبرانو په نيولو سره هلمند ولايت د دوي دلست په سر کي او ننګرهار ولايت د ٦٠ قاچاقبرانو په نيولو سره د لست په دوهمه برخه کي ځاي لري .
محمدزمان سنګري ځيني هغه دولتي مامورين هم په ګوته کړه چي د نشه ايي توکو د قاچاق په تور نيول سوي دده په خبره يو تن دهلمند ولايت د يوي ښوونځۍ ښوونکي ، په کندهار کي ديوي امنتي پوستي قوماندان ،د ميدان وردګو ولايت د ٢٠١قول اردو قوماندان ، د تخار ولايت ديوي ولسوالۍ امر او دکابل دنړيوال هوايي ډګر دوه امنتي موظفين دي .
د يادوني وړ ده چي دنشه ايي توکو سره دمبارزي د عدليي او قضايي مرکز د پلټني او بر رسى لوي مدير او د ابتدايي محمکمي لوي ريس کندهار ته د دي ولايت د چارواکو سره د همږغۍ دپيدا کولو په موخه راغلي څو څنګه وکولاي سي چي دنشه ايي توکو په وړاندي ګډه مبارزه چټکه او ګړندۍ کړي .