د احمد ظاهر ژوند ته لنډه کتنه

٢٣ د لړم ١٣٨٤

احمد ظاهر دډاکټر  عبدالظاهر زوی و چې د ١٩٤٦ کال کې د جون په  ١٤نیټه د لغمان په ولایت کې زیږیدلی و  . داحمد ظاهرلنډژوندوښودله چې هغه د دې  لپاره زیږیدلی و چه دخپل لوړ استعداد لویه برخه افغان موسیقۍته ځانګړې کړي  .  ده په ډیر کم عمر کې  دموسیقۍ د هنر سره مینه لرله،او په ډیر کم عمر کې یې دټمبور، مانډولین او اکارډیون په غږولو پیل وکړ . د نولس سوه شپیتمو کالونو په پیل کې احمدظاهر دکابل د حبیبی د لیسې څخه په کنسرتونو لاس پوری کړ  او  د خپلوملګرو په ګډون یې ځانته د موسیقۍ یو  ګروپ هم جوړ کړ.

داحمد ظاهر ښکلی او زړه راښکونکی غږ او دموسیقۍ په برخه کې د هغه دژور احساس له برکته وه چې هغه په افغانستان کې په نوي کیفیت سره د موسیقی لارښونه کوله . له نیکه مرغه احمد ظاهر ددې امکانات هم لرل چې دهیواد دوتلو موسیقي پوهانو لکه ساکفونسټ استاد اسماعل عظیمي ، ترومپت نواز استاد ننګیالی ، کمپوزر نېنواز، ترانه ساز مسحورجمال او داسې نورو سره یوځای  د خپل استعداد د لا ځلاولو لپاره کار وکړی .

د احمد ظاهر دورې  د افغانستان په موسیقۍ کې د یو نوی خوزښت د راوستلواستازیتوب کاوه چې دلویدیځ د موسیقۍ تر اغیزلاندې  راغلی و . دغه موسیقې ته اماتورلقب ورکړل شوی و، ځکه چې سندرغاړی یې په دودیزه توګه دداسې کورنیو څخه و چې د موسیقۍ سره ئی هیڅ ډول تړاو نه لاره . په هر حال د لویدیځ د موسیقۍ د اغیزجرړو لا پخوا خوزښت پیل کړی و چې نښې یې په ١٩٥٠ کلونو کې د افغانستان دراډیو ټلویزیون وتلو هنرمندانو  لکه استاد سرمست، ساربان او نینواز  کې ښکاره کیدلی .

احمد ظاهر  د موسیقۍ سره دخپلې ځانګړې میني او ټینګې ارادې په اساس ٢٢ البومونه ثبت کړي  او دري ټوکه نوریې هم د افغانستان راډیو له لارې خپاره شوي دي چې د احمد ظاهر د غږ د مینه والو تنده پرې ماتیږي . احمد ظاهر د غزلو ، آزادو شعرونو او عشقي سندرود ویلو تر څنګه ځیني داسې سندري هم ویلی دي  چې دهیواد  واکمنوسیاسي اوټولنیزو حالاتو ته ځانګړي شوي وي ، لکه زندګي اخر سراید،مرا از این قفس آزاد کنید او داسې نورې سندرې   چې  احمد ظاهرپه هغوي کې د هغه وخت  د حالاتو په هکله خپل فکر،درد او اعتراض په ډیر ښکلی غږاو هنرسره مینوالو ته بیان کړي .  

له بده مرغه داحمد ظاهر عمر ډیر لنډو او د٣٣ کالو په عمر  د ١٩٧٩ کال  دجون په ١٤نیټه یې په یوه دردونکي پیښه کې  خپل ژوند له لاسه ورکړ او خپل ټول مینه وال یې په ویر کښینول .