دلمانځه په اخير کښي وښۍ اوچپه طرفته سلام ګرځول

فتوی نمبر (۲۷) :

مستفتي    :   رحمت الله عابد .
ځائ         :   زابل ولايت مرکز قلات  .

ښاغلي مفتي صاحب تاسو ، د بينوا ويب پاڼي ټولو همکارانو او لوستونکو ته سلامونه او نيکي هيلي وړاندي کوم  .
زما پوښتنه پدې ډول ده چي د لمانځه په اخير کښي فقط ښۍ (راسته) خواته په سلام وتلو کښي کومه ستونزه سته او يا دا چي لمانځه ته کوم نقصان رسيږي ؟ ځیني خلګ فقط ښۍ طرف ته په سلام ګرځولو بسنه کوي ، کومه طریقه يې غوره ده  ؟ د ځواب په هيله  .

الجواب وهو الملهم للصواب  .
نحمده و نصلي علی رسوله الکريم  .
په اخيري ناسته کښي وروسته له دې چي «اللهم ربنا الخ» هم وويله سي نو سنت طریقه داده چي اول وار به وراسته طرفته سلام ګرځول کيږي ، او دوهم وار به وچپه طرفته سلام ګرځول کيږي ، که په هیره څوک اول وار وچپه طرفته سلم وګرځوي او بيا وراسته طرفته نو دا پروا  نلري ، او که سړئ يواځي و راسته طرفته سلام وګرځوي او وچپه طرفته يې سلام هير سي او ولاړ سي نو تر څو چي مخ يې له قبلې څخه نه وي اړولئ بيرته به راګرځي کښيني به او و چپه طرفته به سلام ګرځوي ، او که سړئ په قصد سره و چپه طرفته سلام ګرځول پريږيدي نو که څه هم لمونځ خويې صحيح سو خو ترک د سنتو يې وکړ ، نو په دې وجه هغه بدي او سزا يې په برخه کيږي کوم چي هغه په ترک د سنتو سره د انسان په برخه کيږي   .
(مراقي الفلاح علی حاشية الطحطاوي مع الطحطاوي ص ۱۴۹ )  . 

حرره  :  احقر المخلوقین محمد معين الدين أبوالفضل ، أفغاني کان الله له  .