((په افغانستان کي د ملت جوړوني لرليد )) يو ورځنی علمي سيمينار جوړ شو

۱ -  ډېرو افغان حکومتونو په افغانستان کي د ملت جوړوني په اړه کومه ځانګړې او ښکاره ستراتېژي نه درلوده  او دې ملي دندي ته يې هغسي چي لازمه وه اوږه نه وه ورکړې .  د افغانستان نننی دولت هم نه يوازي دا چي د ملت جوړوني کومه ښکاره ستراتېژي نه لري  د ملي هويت په پخولو کي هم پاته راغلی دی .

 ۲ -  د وروستيو درې لسېزو جګړو ملي ارزښتونه تر پښو لاندي او افغاني ټولنه يې د ملي هويت د بحران سره مخ کړې ده ، دافغانستان دولت دي په چټکۍ سره  د ملي هويت د پخولو او ملي پيوستون د خوندي کولو لپاره د ملي ښووني او روزني ځانګړې کلتوري او ټولنيز پروګرامونه پلي کړي .

۳ -   دا چي ملي ژبه د ملت جوړوني دملاتېر جوړوي نو د افغانستان دولت دي د ملي ژبي د پراختيا او انکشاف د پاره د اوږدې مودې پروګرامونه په کار واچوي .

۴ -  د ملت جوړوني  اوملي انکشاف دټولو ملي پروګرامونو د ښه تطبيق له پاره دي د افغانستان دولت ژر تر ژره يوه رښتېني سرتاسري او جامع سرشمېرنه ترسره کړي .

د سيميناروينا کوونکو او ګډون کوونکو د افغانستان په جنوب کي جګړې ته هم ګوته ونېول او هغه يې د ملت جوړوني په وړاندي ګواښ وباله  :

۵  - دا چي  د افغانستان په جنوب کي روانه جګړه د دولت ، ملت او ملي هويت فزيکي جوړښت ورانوي نو د افغانستان دولت دي ژر تر ژره د جګړې د لاملونو د له منځه وړلو او سياسي ثبات دراوستلو په لار کښي بنسټیز ګامونه اوچت کړي .

۶  -  د افغانستان په سهېل کي له جګړې سره مخالفت له امريکي سره دښمني نه ده ، افغانان او امريکايان دوستان پاته کېدای شي خو چي دا دوستي دمتقابل احترام پر بنسټونو ولاړه وي .

۷ - افغانستان د پاکستان او هندوستان تر منځ د غير مستقيمي جګړې ډګر ګرځېدلی ، افغانستان مېشت بهرني ځواکونه دي په افغانستان کي د ګاونډيوهيوادونو ، په تېره بيا د پاکستان ، سياسي ، پوځي او کلتوري لاسوهني بندي او افغانستان دي د هغوی د سيالۍ له اغېزه راوباسي .

د سيمينار ګډون کوونکو په پای کي وپتېيله چي :

۸ ـ د افغانستان دولت دي ټول ملي سيمه ايز او نړېوال امکانات په افغانستان کي ديوه ملي حاکميت د خوندي کولو او يوه موټي ملت په جوړولو کي په کار واچوي .

دعکسونو رالېږونکی : ښاغلي ډاکټر يحيی وردګ