له جلال اباد څخه د محمدساغر راپور
د ب ګ راليږنه د جنوري ١٨مه / جلال اباد
د ننګرهار د ځينې سيموخلک چې د طالبانو په حکومت کې يې کار کاوه له دې امله کورونه پرېښې دي چې د دوئ پر وينا پوليس يې د طالبانو سره د اړيکو په تور تورنوي.
د جوزجان وﻻيت نه راکډه شوى ګل ولي چې اوس د جلال اباد په سراچه کې اوسېږي.وايي چې د طالبانو په وخت کې يې په نوموړي وﻻيت کې د ښوونې او روزنې د رياست د اداري مديريت په څانګه کې د يوه کم وخت لپاره دنده پر مخ بيوله، او کله چې د طالبانو حکومت له منځه لاړ د هغه ځاى چارواکو ونيوه.
نوموړى وايي.((زه په دې تور چې د طالبانو په وخت کې مامور پاتې شوى ووم...زمکه رانه د دوستم کسانو واخيستله او زه ونيول شوم خو ترې راوتښتيدم او ډېر زر مې ننګرهار ته رامخه وکړه )) ،
ده دلته د کومې وېرې د احساسولو په اړه وويل.((دلته کومه وېره نه لرم ځکه چې زما نيونه د هغه ولايت د د چارواکو شخصي خوښه وه اوکومه قانوني بڼه يې نه درلوده)).
د نوموړي په وينا هيڅ جرم يې نه درلوده او داچې د طالبانو د وخت دنده يې په تېرو حکومتونو کې هم کړې وه.
هغه وايي.((د سرخرود ولسوالۍ اوسيدونکى حاجي شېر محمد چې په پېښور کې اوسېږي او ننګرهار ته د خپل خورې د واده په مراسم کې د گډون لپاره راغلى وو سولې او جنګ راپور ورکوونکې ادارې ته وويل چې د طالبانو په وخت کې په خپله ولسوالۍ کې د تذکرو مامور پاتې شوى ځکه خو بيا وتښتيده.
نوموړي وويل.((زه پيښور ته ځکه لاړم چې هره ورځ به راپسې پوليس راتلل او نوره مې ګوزاره نه کېده.....)) . هغه زياته کړه .((اوس هم په پټه راغلى يم او که پوليس خبر شي نو سمدستي به مې ونيسي)).
د ده پر وينا کوم جرم يې نه دى کړى او پوليسو فقط د پيسو لپاره نيوه.دى وايي.((پوليسو نه يو لک روپۍ غوښتي او راته يې ويل چې که دلته ژوند کول غواړي په دغو پيسو د طالبانو د ليست نه وباسو)). د نوموړي په وينا نه خو ورسره دغومره پيسې وي او نه يې هم د يو ناکړې جرم د څه سزا د ګاللو په حق کې وو.
د ننګرهار د خوګياڼو اوسيدونکى ولي محمد کنډيوال د خپل هغه ورور(نورمحمد) چې اوس د هالينډ په هيواد کې دى او د طالبانو په وخت کې د ننګرهار پوهنتون محصل وو د خپل وطن نه د تېښتې کيسه کوي او وايي چې هغه مجبوره وو چې له دې ځاى پښې سپکې کړي.
نوموړي وويل.((نور محمد په پوهنتون کې ليليه نه درلوده نو د مجبورۍ له امله يې د طالبانو په يوه نزدې پوسته کې د شپې د څوکيدارۍ دنده واخيسته ....يوه ورځ ده ، هغه سړى چې د پوستې والا د غلا په تورنيولى وو د شپي خوشې کړ ځکه چې د تورن سړي نه ﻻس غوڅېده.........همدغه وو چې زما ورور پوسته او پوهنتون پرېښوده او دا چې طالبان ورپسې هر ځاى کې د سيورې غوندې ګرځېدل نو ځکه وطن پرېښودلو ته مجبوره شو)).
د ولي محمد په وينا د ده ورور( نور محمد) غوښتل چې د طالبانو له سقوط نه وروسته بېرته هيواد ته راستون شي خو دا چې د دې ځاى پوليسو ورپسې لټه شروع کړې وه او ويل يې چې هغه د طالبانو په دولت کې دنده اجرا کړې وه.
ولي محمد کنډيوال وايي.((دلته روزانه زمونږ کور ته پوليس راځي او وايي چې نور محمد راته حاضر کړئ ځکه چې هغه طالب وو.......مونږ خپل وروردوئ ته په سپارلو په زوره د بلا په خوله کې نه شو ورکولى... )).
د جلال اباد ښار د مجبور اباد سبحان الدين قاضي زاده بل هغه تن دى چې پر وينا يې يو ورور د ورته پېښې له امله په لندن کې د مساپرۍ شپې ورځې تېروي.
د ده پر وينا د ده ورور سيف الدين په ننګرهار کې د عربانو په پيسو د چليدونکي پوهنتون ((ننګرهار ساينس او ټکنالوژۍ پوهنتون)) محصل وو اودهغه لاريون چې د دغه پوهنتون محصلينو په عراق باندې د امريکا د دولت خلاف کړې وه مشري کوله.د سبحا نالدين په وينا له همدې امله يې ورور يوځل بندي شو او کله چې يې د پيسو له ﻻرې راخوشې کړ نو خارج ته وتښتيده.
هغه چې ډېر قاريدلى معلومېده وويل.((ﻻريون کول د هر چا حق دى ....عين امريکايي عوامو هم د خپل دولت په خلاف ﻻريونونه وکړل .........نوبيا ولې دلته پوليس دهغوئ ورور غواړي او وايي چې بايد دوئ ته حاضر کړلى شي)).
خو د ننګرهار د امنيې قوماندان حاجي حضرت علي بيا وايي چې دوئ هيڅ بې هيڅه څوک نه په تکليفوي او خامخا کوم دليل به لري،
نوموړي وويل .((مونږ د هر چا پسې نه ورځو او نه ترې پوښتنې کوو...او چاپسې چې پوليس تللي يا يې غواړي هغوئ به خامخا د دولت سره کومه دوسيه لري)).
نوموړي زياته کړه.((مونږ سره په ادارو کې اوس هم داسې خلک شته چې د طالبانو په وخت کې يې هم په همدې پوستونو کار کاوه خو مونږ ورته څه نه وايووځکه جې پاک او بې ګناه دي.........خو هغه ځوک چې دولت پرې ملاحظات لري هغه بېله خبره ده)).
