١٣٨٤ د غويي لسمه
مخترعینو دانسانانو دپاره، د دوی د ژوند د آسانتیاو پخاطر ډېر شیان د علم له برکته اختراع کړي دي، مثلاً: تلګراف، ټیلیفون او نور . . . بیا یې په دریاب کي دا دونه ابېجه بلا (اوګوټ) بې پښو- بې لاسو را رهي کړې ده ، بلا یې کړې ده، آفرین!
طیاره چي یې الوزولې ده ، لويه آهني پرنده هم لويه - عجبه اختراع ده (اېري والله) وداسي کمال ته .
موټر چي یې پر مځکه وځغلاوه ډېر اعلی ، شاباسی ورته وایم ، خو دخرو لا نه یو خلاص سوي .
راډیو د انسانانو لوی ضرورت پوره کړئ دئ ، په حالاتو چټک سره خبریږي . په تلویزیون کي چي ټوله نړۍ لیدل کیږي دا هم ( آ ئـينهء جهان نماء) ده - لوی ایجاد دئ او د حیرت نو آور دئ ، صد آفرین!
کمپیوټر خو (هو- ها) مې ( مه يې ) کوه خبري ، چي و بشر ته د غټ بري او خدمت نمونه ده - ډیري غوټي په خلاصیږي - د حیرت ګوته مو په غاښ ورته نیولې ده . هغه چا، چي ګرځنده ټيليفون ( موبائل )را ایستلئ دئ ، (دمور شیدې) خدای (ج) خبر چي بله مور به داسي زوی زېږوي . برق ، طبي - زراعتي آلات او خدمات خو مه ښوروه . دا ټول اختراعات ، د مخترعینو له خوا څخه انسانانو ته عظیمي عطیې ( پېرزويني ) دي ، مګر بدبختانه مختر عینو د دې ګټورو اختراعاتو په څنګ کي خورا نابوده ، تاواني او تخریبي ایجادونه هم کړي دي ؛ تباه کنه اسلحې یې جوړي کړي دي . د قتل عام د پاره یې ِِاټم - بم د سرګلولې سره دینګ درولی دئ ؛ دا قسم اختراعات بیا د تحسین وړ نه ، د نفرین او تلعین وړ دي . ما و داسي ایجادګرانو ته خورا درد راځي ، چي د انسانانو د قتل د پاره تباه کن اسباب جوړوي او استعمالوي .
زه دا ډول احمقانه اختراعات سخت غندم . شرم دئ ، چي د اټم نوم په نورو ښو اختراعاتو کي یاد سي ، که یاد سي نو زه د عوامو دغه اصطلاح یادوم ، چي (ټوله مو ، ټر!!) .
