١٣٨٤ د غويي يولسمه ( صالح محمد صالح )
نن د ١٣٨٤ لمريز کال د غويي دمياشتي پر يولسمه نېټه په هلمند ولايت کې د بست فرهنګي ټولنې په هڅو او زيار، د دې ولايت د اطلاعاتو او کلتور رياست په مرسته، د پياوړي شاعر عبدالباري جهاني په وياړ يوه پرتمينه مشاعره جوړه شوه، چې د هلمند ولايت پر شاعرانو او ليکوالو سر بېره د کندهار، زابل، فراه او نورو ولايتونو په سلګونو شاعرانو او کلتورپالو هم په کې ګډون کړى و.
مشاعره د لښکرګاه ښار په ’کرزي‘ لوبغالي کې جوړه شوې وه، چې د مازيګر پر پنځو بجو پيل او د شپې تر ناوخته پورې يې دوام وکړ.
د بست فرهنګي ټولنې غړي عبدالصمد روحاني بېنوا ته وويل چې د دې پرتمينې مشاعرې لګښت د بست فرهنګي ټولنې د غړو او د دې ولايت د والي او ښاروال له خوا برابر شوي، چې په دې منځ کې د سيمې ملي سوداګرو هم خپله مرسته نه ده سپمولې.
دا په تېرو څو لسيزو کې د هلمند ولايت په کچه يوه بېسارې مشاعره ده چې جوړېږي، کتونکي په دې باور دي چې د دې ډول غونډو په جوړېدو سره به د سيمې د فرهنګيانو ترمنځ کلتور اړيکي ټينګ او خلک به په خپلو کې ډېره سره نژدې شي.
د عبدالباري جهاني په وياړ دا دويمه ستره غونډه چې په دې ورستيو اوونيو کې جوړېږي، يوه غونډه تېره اوونۍ په کندهار کې جوړه شوې وه، چې هلته هم په لسګونو کسانو ګډون کړى و .
