دخپریدو نیټه : 2005-05-08 مخپرونکئ : 039 - دبېنوا اداره - کابل

په هالنډ کي د ارواښاد حميدي د جنازې لمونځ وشو

عبدالله احسان - هالنډ

١٨ د غويي ١٣٨٤ هالنډ – عبدالله احسان

د تکړه ليکوال او خوږژبي ژباړونکي ارواښاد ميرزاعلم حميدي د جنازې لومړي مراسم نن يکشنبه د ١٣٨٤ لمريز کال د غويي دمياشتي پر ١٨ نېټۀ د هالنډ د اوتريخت په ښار کي ترسره شوه .

نن غرمه د هالنډ په وخت دوولس بجې د ارواښاد حميدي د کورنۍ ښځينه غړو او يو شمېر دوستانو د خدای بخښلي حميدي سره وروستۍ ليدنه دامستردام په ( AMC) روغتون کي ترسره کړه ، د هغوی پاک روح ته يې دعا وکړه او دوې بجې د ارواښاد جنازه د روغتون څخه دهغوی د کورنۍ د غړو له خوا د اوتريخت ښار د اوفرفيخت جماعت ته ولېږدول شوه .

د ارواښاد پاک روح ته د دعا او وروستۍ مخه ښې په دې مراسمو کي پر هالنډ مېشتو افغان ليکوالو اديبانو ، فرهنګپالو او د ارواښاد د کورنۍ د غړو او دوستانو برسېره په اروپا کي د افغاني کلتوري ټولنو د ګډي جرګې مشر ښاغلي زرين انځور ، په هالنډ کي د افغاني کلتوري ټولني مشر ښاغلي رحمت ګل ځواکمن ،په بلجيم کي د افغانستان د پوهاوي ، مرستي اوپيوستون ټولني مشر ښاغلي نجيب احمدزي ، او د نوموړو ټولنو د يو شمېر غړو ترڅنګ د خدای بخښلي حميدي خواخوږو دوستانو د هالنډ د بېلابېلو ښارونو او همدا ډول داروپا د نورو هيوادونو څخه ګډون کړی وو .

ديادوني وړ ده چي په امستردام ( AMC) روغتون کي د زړه د جراحۍ د څانګي کارکوونکي ښاغلي ډاکټر سيدنصير احمد چي د ارواښاد حميدي په درملنه کي يې برخه لرله او په روغتون کي يې د ارواښاد په لومړۍ ورځ د هغه د ژوند وروستي مجلسونه کړې وه هم په دې مراسموکي ګډون کړی و .

په سلګونو تنو افغانانو د ارواښاد حميدي د جنازې په لمانځه کښي چي په يوه غټه مسجد جامع کښي ترسره شو برخه واخستله .

د جنازې تر لمانځه وروسته د ښاغلي قاري عزيز له خوا دقرآن عظيم الشان څو مبارک ايتونه وويل شوه ، او د ارواښاد حميدي پاک روح ته د دعا لاسونه پورته شوه ، ورسته ښاغلي ډاکټر خوشال روهي د ارواښاد حميدي ژوند ليک واوراوه ، او د هغه د ژوند او اثارو په اړه يې رڼا واچوله ، تر دې وروسته ليکوال او شاعر ښاغلي سلېمان لايق د ارواښاد حميدي د ژوند په اړه څو لنډي خبري وکړې او دهغه روح ته يې د دعا لاس پورته کړ تر دوی وروسته د دري ژبي ليکوال ښاغلي کريم ميثاق چي د انګليستان څخه دې مراسمو ته راغلی و د ارواښاد حميدي په اړه څو خبري وکړی ، ورپسې د ارواښاد ميرزاعلم حميدي د کورنۍ له غړو څخه ښاغلي ډاکټر اضغر خېل د خدای بخښلي حميدي دژوند اړه څو خبري وکړې، ددوی روح ته يې د دعا لاس پورته کړ ، هيواد ته د ارواښاد حميدي دجنازې د ليږدولو په اړه يې وويل :

د ارواښاد حميدي جنازه به راروانه چارشنبې د می دمياشتي پر ١١مه نېټۀ د جرمني دفرانکفورټ له هوايي ډګر څخه کابل ته ولېږدل شي چي د پنجشنبې سهار ( ٨٤ لمريز کال د غويي ٢٢مه ) د می دمياشتي پر ١٢مه به کابل ته ورسيږي .

هغه وويل چي : د ارواښادجنازه به کابل ته د رسېدلو سره سمه د خوست ولايت پر لور ولېږدوي، چيري چي به راروانه جمعې ورځ د غويي دمياشتي ٢٣مه داسمعيل خېلو - ډډوالو په سيمه کي د جنازې د وروستيو مراسمو وروسته په خپله پلرنۍ هديره کي خاورو ته وسپال شي .

نوموړي د ارواښاد حميدي په وير کي د يوه کوچني شعر تر ويلو وروسته د ټولو ګډون کوونکو د راتګ، په دې مراسمو کي دبرخي اخستني او خواخوږۍ ښودلو څخه مننه وکړه .

د نننيو مراسمو په وروستۍ برخه کي د ارواښاد ميرزاعلم حميدي جنازه چي پر ګرځنده کټ پرته وه د مسجد منځنی برخي ته يووړل شوه ټولو راغليو افغانانو يې د وروستۍ ليدني په ترڅ کي روح ته د دعالاسونه پورته کړه ، او مخه ښه يې ورسره وکړه . دجنازې مراسم ماسپښين درې بجې پای ته ورسېدل .

انا لله و انا اليه راجعون د ارواښاد حميدي روح دي ښاد وي !