د غويی ٢٩ مه ١٣٨٤ - ( آزادي)
اسرار احمد کريمزی شل کلن افغان زلمی دی چې د کمپيوټر په برخه کې زيات مهارت لری. نوموړي په دې وروستيو کې په پښتو ژبه د افغان مسنجر په نامه د اوو مياشتو په موده کې يو پروګرام جوړکړی دی. د دغه پروګرام له مخې افغانان کولي شي چې په پښتو ژبه د کمپيوټر له لارې د يو له بل سره ليکلې خبرې (چټ) وکړي.
اسرار احمد تېر کال په تاجکستان کې د کمپيوټر د ماهرانو په يوه سيالۍ کې برخه اخيستې وه چې په هغې کې يې د سروزرويو مډال تر لاسه کړی و.
سږ کال يې بيا هم د کمپيوټر د پروګرامونو د جوړونې په سياليو کې ګډون وکړ او دا ځل په دې بريالۍ شو چې د ٤١ هيوادونو د ١٧١ کمپيوټر پوهانو په منځ کې دوهم مقام وګټی او د سپينو زرو مډال په لاس راوړی.
