د پښتو ژبي په پرمختګ کي ولس تر دولت ډيري هڅي کوي !؟

يونس برهان - کابل

په انټرنټ کې د پښتو د غځېدنې په ترڅ کې دوه نور وروستي پرمختګونو ته هم نغوته کولاى شو، چې د دې لاري د لارويانو د لا هڅولو لپاره بايد ياد شي. 

خبر شوي به ياست چې په وروستيو کې د کښته کولو وړ انګريزي - پښتو ډيکشنريانې په لومړي ځل د دوو ويبپاڼو لخوا وړاندې او په وړيا توګه د لاسرسي وړ شوې.  AfghanIT.net او www.Qamonsona.com  دواړو نږدې يو ډول ويېپانګې په يوه مهال د وړيا کښته کولو لپاره پرليکه کړي.  خو په دې لړ کې نوى پرمختګ دادى چې د www.AfghanIT.net چلوونکي، اسرار احمد کريمزي، اوس خپله پخوانۍ انګريزي - پښتو ډيکشنري په دوه ژبيزه بڼه ، يانې پښتو – انګريزي, او انګريزي - پښتو  نوې کړې ده، چې مينه وال يې له http://www.afghanit.net/downloads.asp نه ترلاسه کولاى شي.

په داسي حال کي چي د افغانستان د دولت له خوا پښتو ژبه له پامه غورځول شوې ښکاري ، خو ؛ د پښتو ژبي د پرمختګ بېلګي په تېرو څو کلونو کي خورا زياتي دي ، يوه له هغو نه داده چي : د بي بي سي پښتو څانګې خپله ويبپاڼه په روانه اونۍ کې په  نوې او لا معلوماتي بڼه جوړه کړه، چې دا كار د پښتو خبري ويبپاڼو په ډګر کې لا مخکې له مخکې اړين برېښېده.  په اوس کې ډېر لږ شمېر داسې پښتو خبري ويبپاڼې په انټرنټ کې شته، چې په سمه او ناپيېلي توګه کار وکړي.  د بي بي سي د نورو ژبو پاڼې لا وړاندې په ډېر تفصيلي ډول جوړې شوې، خو د پښتو لپاره يې دا وروستۍ بڼه په لنډو خبرونو، اوږدو راپورونو، شننو او بېلابېلو پروګرامونو سمباله ده .