احمد لودين : کندهار
دا چي د تيري يوي مياشتي را په ديخواد سهيل د دوو نورو ولايتونو تر څنګ په کندهار کي هم ١٣٨٩ او ١٣٩٠ ښوونيز کال پيل سوي خو بيا هم ډيري ښوونځۍ د زده کوونکو پر مخ تړلي دي او له کبله يي ډير زده کوونکي د زده کړي څخه بي برخي دي .
د کندهار د پوهني ريس نجيب الله احمدي خبريالانو ته وويل دا مهال په کندهار کي د ښووني او روزني د رياست اړوند ٤٠٣ بابه ښوونځى سته چي ١٨٨ بابه يي د ناامنيو له کبله د زده کوونکو پر مخ تړلي دي خو د ٤٠ بابو د خلاصولو هڅي يي پيل کړي دي چي له دي جملي څخه لس بابه نوري نوي ښوونځى هم جوړي سوي دي چي د کندهار په بيلابيلو سيمو کي موقيعت لري .
احمدي وويل تر ټولو تړلي ښوونځۍ د کندهار په څلورو ولسواليو غورک ، ميانشين ، ريګستان او شورابک دي چي په نوموړو ولسواليو کي د ښووني او روزني بهير هم په ټپه ولاړ دى او د ناامنيو له کبله هيڅ ډول زده کړي کولو ته زمينه نه ده برابره خو بيا هم دوي هڅه کوي چي په نوموړو ولسواليو کي د ښووني او روزني د جاري کولو دپاره زمينه برابره کړي .
د کندهار د پوهني ريس نجيب الله احمدي وويل چي د کندهار د ښووني او روزني رياست په ټول کندهار دري سوه زره نارينه او ښځينه زده کوونکي لري چي د هغوي څخه يي يوازي په تير ښوونيز کال کي يو سل او ديرش زره تنو ته د زده کړي زمينه برابره وه په وينا يي امکان سته چي په نوي پيل سوي تعليمي کال کي دا شمير ١٦٠٠٠٠ تنو ته ورسيږي .
د احمدي په خبره چي د ښوونځيو د پراخيدو دپاره يي په لويو ښوونځيو کي نوي ودانۍ هم جوړي کړي او پر يو شمير نورو اوس هم کار روان دى .
د يادوني وړ ده چي کندهار د هيواد د نورو سيمو په پر تله نارامه او ناامنه سيمه ده چي دې بدبختۍ د نورو پرمختيايي کارونو تر څنګ د ښووني او روزني پر روان بهير هم ناوړه سيورى غوړولى دى او له کبله يي ځوان او نوى نسل تر ډيره ځايه د زده کړي څخه بي برخي دى .
