په هندوستان کې د افغان ځوانانو پرتمينه غونډه

ځاي: نوي ډيلی، هندوستان:
نېټه: د پيلنۍ ورځ، د ۲۰۱۲ زيږديز کال د مارچ د مياشتې دريمه
اهداف:
۱- د افغانان ځوانانو بنسټيزې ستونزې او د هغو د حل لپاره لارې چارې لټول.
۲- د افغان يون د مبارزې د ډول په اړه نظر او پرېکړه.
۳- د هند مېشته افغان زده کړيالانو او زده کوونکو ستونزو ته د حل لارې چارې لټول.
۵- هند ته د تلونکو افغان ناروغانو سره د مرستې او لارښوونې د يوه مرکز جوړول.
۴- د هند مېشته افغانانو ستونزې او د حل لارې چارې ېې.
۵- د هندي پښتنو او افغانانو تر منځ د اړيکو پياوړي کول او د هغوي تر دمنځ د پښتني هڅوب پښتو راژوندي کول.
 ۶- د هند په اړتونونو (زندانونو) کې د افغان بنديانو د خلاصون لپاره د هڅو همغږي کول.
 ۷- په هندوستان کې د افغان يون د څانګې جوړول.
ګډون کوونکي: هند مېشته افغان زدکړيالان، د افغان يون استازي، هندي پښتانه او مېلمانه.
 بشپړ راپور:
پښتانه ځوانان ډېره موده ورورسته وتوانېدل تر څو د افغان يون او افغان ولس د ودې په موخه په نوي ډيلي کې غونډه وکړي. په غونډه کې يو زيات شمير هڅاندو ځوانانو ګډون کړئ وو. غونډه د غرمي په ۱۱ بجې د قران کريم په مبارکو اياتونو پيل شوه. د وياندويۍ چارې يې ښاغلي عبدالقهار کټوازي پر مخ بيولي. ځوانانو ته د ښه راغلاست نه وروسته، د افغان يون د کړنو په اړه معلوما ت وړاندې شول، ښاغلي ايمل څړوال د افغان يون د پيژندنې، هلو ځلو، او کړنو په اړه ګډونوالو ته مالومات ورکړل او زياته يي کړه:
 د هيواد د سياسي مخکښانو او ګوندونو شاليد ته په کتو سره ځوانانو پريکړ وکړه تر څو داسې يو نوي او پر ځوان ځواک ولاړ خوځښت رامنځته کړي چې په ريښتينې توګه د هيواد او هيوادوالو ربړو او ستونزو ته د حل لارې چارې پيدا کړاي شي. د ډيرو لويو او پخوانيو سياسي ګوندونو پر خلاف پښتون يون د سراسري فکري ويښتابه لپاره هڅې کوي او غواړي خلکو ته داسې څه وړاندې کړي چې د هغوي لپاره د بنسټيز پرمختګ لامل شي.
 افغان يون د ۲۰۱۱ کال د مارچ د مياشتي په ۸ نيټه د څو تنو هڅاندو او با احساسه پښتنو ځوانانو لخوا د نړۍ په ګوټ، ګوټ کې له افغان ځوانانو سره د اړيکو د ټينګولو او په عمل کې يو ګډ دريځ ته د رابللو په موخه جوړ او د فيسبوک په نړۍ کې په ليکه شو، چې په دي موخه کې تر ډيره بريده بريالي شوي هم يو. د فيسبک په يوه ګروپ کې مو تر ۲۵۰۰۰ تکړه ځوانان سره يوځاي کړي او دا بهير لا پر مخ روان دي، په عملي ډګر کې مو په هيواد دننه او بهر په مبارزه پيل کړې ده. په هيواد کې د يووالي بنسټ په نوم کاري کميټه لرو چې موخه يې د نورو خورو ورو خوځښتونو سره خبرې کول او يوه دريځ ته رابلل دي. تر اوسه مونږ په دې توانيدلي يو چې پنځه بيلا بيلې ډلې سره يو کړو او په ګډ دريځ سره سلا شو.
 مونږ د افغان يون ځوانان له هيچا سره پر دې بنسټ چې دا پر کوم ګوند او يا ډلې پورې تړلي دي او يايي سياسي مفکوره څه ده تعصب او دښمني نه کوو. ټول افغانان زمونږ وروڼه دي. هر څوک چې ملي او اسلامي ګټو ته وفادار وي او زمونږ موخې خپلې وګڼي زمونږ غېږ ورته پرانستې ده.
 د هندوستان دا لمړۍ غونډه به زمونږ اخرنۍ غونډه نه وي، مونږ به دلته د افغان يون يو مرکز جوړوو تر څو په هند کې د افغانانو ستونزې وڅيړي او د هواري لارې چارې يي وسنجوي.
 د هند لپاره د افغان يون مرکزي دفتر به په نوي ډيلي کې وي او د هند په نورو ايالتونو کې به هم استازي ولري، د مرکز يواځينۍ موخه د افغانانو د ستونزو څيړل او هغوي ته د هواري د لارو پيدا کول دي.
 د پښتو کتابونو د ژباړې اړوند يې داسې وويل: که مونږ غواړو چې د پښتو او پښتنو لپاره خدمت وکړو نو اړينه ده چې پښتو ژبې ته علمي کتابونه را وژباړو، په دې کار کې زده کړيالان پوره مرسته کولاي شي نو دوي بايد دا بار په خپلو اوږو واخلي تر څو د راتلونکي نسل لپاره مو ستر خدمت کړي وي او پښتو مو نوره هم غني کړې وي.
 د هند او افغان حکومت سره په همغږۍ کې به افغان زده کړيالانو ته د انګريزي ژبې د زده کړې زمينه برابره کړو تر څو په خپلو زده کړو کې له ستونزو سره مخ نه شي.
 او د شونتيا تر بريده به هغه زده کړيالانو ته چې د کانکور په ازموينو کې بي پايلې پاته کيږي په هند کې د زده کړو زمينه برابره کړو.
 د ښاغلي څړوال له خبرو څخه وروسته له هېواد څخه راغلي ملګري ښاغلي انورالحق ژمن برخه والو ته د خبرو په ترڅ کې وويل:
 مونږ پښتانه ځوانان د دې توان لرو چې هيواد آباد کړو او ولس له دې دېرش کلن ناورين څخه را وباسو، په افغانستان کې ډيرې ډلې او شخصيتونه په بهرنيو جاسوسي کړيو او دولتونو پوري تړل شوي دي، همدا لامل دي چې د ځوانانو د سياسي خوځښت سره مخالفت ښايي، ځوانان په سياسي ډګر کې د پرمختګ توان او وړتيا لري.
 مونږ ته ملي ګټې تر هر څه لمړيتوب لري او په همدې موخه مو مبارزه پيل کړې ده.
مونږ غواړو له ټولو پښتنو ډلو سره په ګډه کړنلاره جوړه کړو او د عملي کولو په لارو يي خبرې وکړو.
 زمونږ يون افغان يون دي زمونږ غيږه ټولو افغانانو ته پرانيستې ده، له هيچا سره د ژبې، قوم، سمت او مذهب په بنسټ تعصب نه لرو.
 د ښاغلي ژمن له وينا څخه وروسته، په هند کې د افغان زده کړيالانو د ټولنې بنسټ ايښودونکي ښاغلي ابو محمد همکار په خپلو څرګندونو کې داسې وويل:
 په هند کې د افغان زده کړيالانو ټولنه سر له همدا اوس څخه له افغان يون سره يووالی اعلانوي او مونږ د افغان يون تر چتر لاندي خدمت کول خپل وياړ بولو.
 نوموړي افغان يون د دې دريځ په تأييد سره وويل چې د افغان زده کړيالانو ټولنه به د هند له حکومت سره په همږۍ کې د افغان زده کړيالانو لپاره د انګريزي ژبي درې مياشتني کورسونه برابر کړي تر څو د زده کړو په مهال له ستونزو سره مخامخ نشي.
 ښاغلي همکار زياته کړه چې هند ميشته افغان زده کړيالان به د پښتو ژباړي په برخه کې هر اړخيزه مرسته وکړي.
 د ښاغلي همکار له خبرو وروسته ښاغلي حفيظ الله پاڅون د دريځ سر ته راوبلل شو، ښاغلي پاڅون په خپله وينا کې داسي وويل:
 په هند کې د غونډي موخه دا وه چې مونږ نړيوالو ته دا وښايو او په زغرده ورته ووايو چې مونږ (پښتانه) ترهګر نه يو، وژونکي او داړه ماران نه يو، مونږ د ستر خوشال خان او ابدالي احمد خان لمسي يو، مونږ د سوري شيرشاه او هوتک ميروئيس خان لمسي يو، مونږ سوله غواړو، دا دري لسيزي کيږي چې مونږ د جنګونو له امله هر څه له لاسه ورکړل.
 زمونږ د غونډي موخه دا ده چې نړيوالو ته د پښتنو ريښتيني انځور وړاندي کړو.
که مونږ په دي وتوانيږو چې خپل هيواد او ولس نړيوالو ته په ريښتيني ډول ور وپيژنو نو دا به مو ستر خدمت کړي وي.
 د ښاغلي پاڅون له وينا څخه وروسته د ډيلي د (جامعة ملية اسلامية پوهنتون) د افغان زده کړيالانو په استازيتوب ښاغلي خالد يوسفزي خبرې وکړې، ښاغلي يوسفزي داسې وويل:
 مونږ د افغان يون سره يووالی کوو او د د هڅو د لا بريا لپاره ېې لاندې وړانديزونه لرو:
 ۱- افغان زده کړيالان په څو ډلو ويشل شوي دي، يون بايد داسي پلان تر لاس لاندي ونيسي چې ټول افغان زده کړيالان د يوه چتر لاندي راټول کړي او د افغان زده کړيالانو په نوم يوه ټولنه جوړه کړي چې هلته د هيواد د ټولو وروڼو قومونو زده کړيالان غړيتوب ولري.
 ۲- د عبدالاحد مومند په نوم يو سيمنار دې جوړ کړاي شي، هغه يواځينی افغان دی چې فضا ته ختلی او هلته يي په پښتو خبرې کړې دي. پښتو د نړۍ څلورمه ژبه ده چې په سپوږمۍ کې خبرې پرې شوې دي.
 ۳-افغان زده کړيالانو ته د علمي غونډو او علمي مناظرو جوړول تر څو زمونږ علمي سويه لوړه شي، د ژبي او قوم په نوم غونډي زمونږ په درد نه خوري.
 ښاغلي خالد د خپلو خبرو په پاي کې د افغان يون سره د هر ډول همکارۍ ژمنه وکړه.
له ښاغلي يوسفزي وروسته، ښاغلي هاشم پښتون دريځ ته را وبلل شو تر څو د غونډې له ګډونوالو سره خپل اند شريک کړي، نوموړي داسي وويل:
 پښتانه ډير زرين تاريخ لري، د کلکتې سړک د يو پښتون پاچا (شير شاه سوري) ډيزاين او جوړونه وه.
 مونږ اوس هم دا وړتيا لرو چې خپل هيواد او ولس ته خدمت وکړو او ځان د نړۍ سيال کړو. افغان يون بايد يواځي د غونډو او ليکنو تر بريده پاته نشي. عملي ګامونه بايد پورته شي. زمونږ هيواد دا درې لسيزې کيږي چې ناروغ دی. درملو او طبيب ته اړتيا لري. همدا مونږ ځوانان بايد دا کار تر سره کړو، هر څه په يوه ورځ نه کيږي بايد په حوصله او پوره استقامت مخ په وړاندې ولاړ شو.
 د ښاغلي پښتون څخه وروسته په ډيلي کې افغان زده کړيال ښاغلي عبدالرشيد لودين د دريځ سر ته را وغوښتل شو تر څو د غونډي له ګډونوالو سره خپله وينا شريکه کړي، ښاغلي لودين د خپلې وينا په ترڅ کې وويل:
 مونږ په خپله ملامت يو چې په داړه مارانو مو هيواد سپارلي، د شيرپور غلو ته همدا مونږ (ولس) رايه ورکړه او په خپل ځان مو واکمنان کړل.
 ښاغلي لودين زياته کړه: د هغه چا پلار چې يو پل وران کړی، يا ښوونځی سوزولی په اولاد يي فرض دي چې هغه بيرته ورغوي او جوړ يي کړي.
 د ښاغلي لودين د خبرو څخه وروسته په هند کې د ميشتو پښتنو په استازيتوب آغلي شين خالۍ کاکړ (شيلپي بټرا) دريځ ته راوغوښتل شوه، آغلي کاکړ په خپلو خبرو کې داسې وويل:
 مونږ په دې وياړو چې نن د خپلو پښتنو وروڼو سره په دې غونډه کې برخه اخلو. د افغان يون له ځوانانو څخه ډېره مننه کوو چې مونږ ته يې دا زمينه برابره کړه چې له نوروهند ميشته پښتنو سره له نيږدې وګورو او د زړه خواله ورسره وکړو. مونږ غواړو چې خپل کلتور او ژبه بيرته را ژوندۍ کړو. په دې چاره کې ستاسو مرستو ته اړتيا لرو. مونږ (افغان يون) ته بلنه ورکوو چې راتلونکې غونډه په جايپور راجستان کې وکړي، تر څو زمونږ د ټولنې ډير غړي وکولاي شي ستاسو سره په غونډه کې ګډون وکړي.
 له آغلي کاکړ وروسته ځيني نورو هند ميشته پښتنو هم خبري وکړي او په خپل وار يي له (افغان يون) سره خپل هر اړخيز ملاتړ اعلان کړ او د خوښۍ په څرګندولو سره يې د يون څخه مننه وکړه چې د نورو پښتنو سره يي د ناستي او ليدلو زمينه ورته برابره کړه.
 د هند ميشته پښتنو له خبرو وروسته د هندوستان د هرياڼه د ايالت د کروکشتر پوهنتون د افغان زده کړيالانو په استازيتوب ښاغلي فردين ځاځي خبرې وکړې او له ( افغان يون) سره يي خپلې هر اړخيزه مرستې اعلان کړې.
 د ښاغلي ځاځي له خبرو وروسته ښاغلی علي جان عادل وينا وکړه او د خپلو خبرو په ترڅ کې ېې داسي وويل:
 مونږ د (افغان يون) هر اړخيز ملاتړ ته چمتو يو او له يون څخه غواړو چې په هند کې د پښتنو د ستونزو په هواري کې د شونتيا تر بريده هڅه وکړي.
 د ګډونوالو او ميلمنو له ويناوو وروسته يو ځل بيا ښاغلی څړوال دريځ ته را وبلل شو تر څو د غونډي د پاي وينا وکړي. ښاغلي څړوال د خبرو په ترڅ کې ټولو ګډونوالو ته ډاډ ورکړ، چې ستاسو اندونه به پوره په پام کې نيول کيږي او عملي کيږي به او زياته يي کړه: مونږ پښتانه يو د خپل حق غوښتنه د سر په بدل کوو، خو د بل د حق د تلف کيدلو په قيمت نه، مونږ په بل چا تعرض نه کوو، خو خپل حق هم چاته نه پريږدو. زه بلي ژبي ته سپکاوي نه کوم خو خپله ژبه راباند ګرانه ده. دا زما حق دي چې په خپله ژبه خبري وکړم خو بل چاته نه وايم چې ته هم هرومرو راسره په پښتو خبري وکړه.
 د ټولو ګډونوالو په رايه ښاغلي ايمل څړوال د (افغان يون) د هند د څانګې مسؤل وټاکل شو، چې د چارو د لا ښه سمبالښت لپاره به د هند په ټولو ايالاتونو کې ډير ژر ايالتي مسؤلين وټاکل شي.د اوس لپاره د افغان زده کړيالانو په چارو کې ښاغلي همکار ته مسؤليت ورکړل شو.
 غونډه د ګډونکونکو څخه د نظرونو په راټولو او د دعايې په ويلو پاي ته ورسيده.