څو سياسي خبري او دافغانستان رغونه ( ٣٩مه برخه )

ليکوال ( کريم ميثاق )

 ژباړه او غورچاڼ : ميرزاعلم حميدي - هالنډ

د جبهې ګوند

ډیرځله د جبهې ګوند څخه مطلب ددوو یا څو ګوندونو په یوه ګوند کې راټولیدل دي . داسې چې کله، کله په یوه ګوند کې د سلیقې او په تېره د لارښوونکو د ځان مننې له کبله غیر اصولي انشعاب راځي خو د دواړو خواوو هماغه پخوانۍ کټې مټې اساسنامې او تګ لارې وي .

 بالاخره څه موده وروسته دواړه ګوندونه غواړي چې بېرته په یوه ګوند کې سره راټول شي یا داسې ګوندونه وي چې له اوله سره بیل خو اساسنامې، کړنلارې او اندونه یې  یو ډول وي او داسې پرېکړې ته رسیدلي وي چې په یوه ګوند کې سره راټول شي. په یوه ګډ ګوندکې د یو ځای کیدو لپاره لومړی د لارښوونې خبره رامنځ ته کیږي؛ دغه اړینه او پیچلي خبره باید په اصولي توګه د ټاکنو له لارې تر سره شي خو څرنګه چې دا دواړه ګوندونه په لومړي ځل د غړو د شمېر له امله سره توپېر لري، هر لوری چې لږ غړي لري هغه په لومړي ځل دغه اصولي خبره بل مهال ته ځنډ وي او په لومړي ګام کې د برابرې لارښوونې غوښتنه کوي؛ هغه هم په دې پلمه چې دا کار بشپړې پېژندګلوۍ، باور او سپیڅلتیا ته اړتیا لري .

 دغه غیرې اصولي او برابره لارښوده ډله همیشه د ګوند په اصولي او غیر اصولي کارونو باندې ناندرې سره وهي او له دې کبله نه یوازې اصلي کارونه ځای په ځای دریږي بلکې په ګوند کې د داخلي سیالو ډلو د سختې سیالۍ له امله نوموړی ګوند له ننه څخه دړې وړې کیږي .کوم چې موږ په افغانستان کې دښي او کیڼو ګوندونوددغه ډول غمیزو شاهدان وو .