جنون

معسود چې د جلبي او د مېوې كڅوړه يې په لاس كې وه په چټكوګامو د خپل كور په لوري روان و،كله چې كورته ورسېد نو څلور كلنه لور يې ورمنډه كړه او د پلار غېږي ته يې ځان واچاوه په همدې ورځ يې پيغله خوښينه هم راغلې وه.
مېرمني يې ورته وويل.
( نور وخت به مېوې نوې نن چې دې خوښينه راغلې نو دا هر څه دې راوړې.)
(نه دامې ستا لپاره هم راوړي)

د معسود د مېرمني د اوو مياشتوكوچني هم په نس و او كله كله به يې د ناروغي احساس كاوه يوه ورځ يې ناروغي زياته سوه او د معسود سره روغتون ته ولاړه درمل يې واخيستل او بيرته پرموټرسايكل د كور په لوري روان سول.
*******************
معسود په ژړا او پريشاني سره كورته راغي مور،پلار او خسرګني ته يې وويل
(مېرمنه مې وركه سوې ډېر مې ولټوله خو پيدا مې نه كړه)
معسود او كورنۍ يې د پوليسو ماموريت ته ولاړ تر څو د پوليسوپه مرسته خپله مېرمن ولټوي.هغه پوليسو ته د پيښي په اړه داسي وويل.
(د روغتون څخه د كور په لوري روان وو، په لاره كې د لوي رود پر سر هغه لوي پله ته چې ورسېدو نو مېرمني مې راته وويل.
( زړه مې بدبد كيږي، خوامې ګرځي.)
( ما موټرسايكل ودراوه)

(مه درېږه كور ته به ځان ورسوو)
(خو ما ټينګار كاوه چې همدلته د پله پرسرتم سو، ما هغې ته وويل كه دې خوا ګرځي نو د پله پرڅنډه ودرېږه اومخ دې د رود خوا ته وګرځوه،زه به هڅه وكړم تر څو يو څه اوبه تاته پيدا كړم.له لږ ځنډ وروسته چې راغلم زما مېرمنه د پله په سر نه وه،دېخوا هاخوا مې وكتل هيڅ مې ترسترګو نسول.)

پوليسو پلټني پيل كړې، درې ورځي وروسته يې د هماغه پله لاندي د معسود د مېرمني مړي پيدا كړ.
كله چې معسود خبر سو نو ډيريې وژړل او ويل يې .
(ما د مېرمني سره خپل هغه زوي هم له لاسه وركړ،كوم چې ډير ژر دې نړي ته راتلونكي و)

د معسود څلوركلنه لور يوازې پاتې سوه خو د معسود خوښينې به د هغې پالنه او روزنه كاوه.
پوليسو د معسود او د هغه د مېرمني د دوستانو څخه څېړني پيل كړې چې آيا كوم چا د هغې سره دښمني درلوده كه نه، خو هيڅ داسي كوم څه يې پيدا نه كړل.پوليسو فكر كاوه چې هغې به ځان وژنه كړي وي،خو كه داسي وي نو ولي؟
*********************
د معسود كورنۍ د معسود او د هغه د لور حالت انديشمن كړي ول نه پوهېدل چې څه وكړي.معسود خپل پلار او مور ته وويل چې لوريې د خپلي خاله سره آرامه او خوشحاله ده او هغه زما لور ته د مور مينه وركولي سي.
د معسود دې خبري د هغه د كورنۍ پام دې ته واړاوه تر څو د معسود لپاره د هغه خوښينه وغواړي.
له دې كار سره ټوله موفقه ول او د كليو مشرانو هم دا لازمه وګڼل چې د معسود خوښينه د معسود سره واده وكړي او هغه څلوركلنه انجلي به د مور خاونده سي او د معسود كور به هم يوځل بيا آباد سي.

معسود د خپلي خوښيني ليدو ته ورغي او غوښتل يې چې د هغې رضايت معلوم كړي او په ډير معصومانه ډول يې د خپلي لور د روزني په اړه اندېښنه څرګنده كړه.
كه څه هم د هغې زړه نه غوښتي چې د خپلي خور چې ډيره ورباندې ګرانه وه ځاي ونيسي خو د خپلي خورزې په خاطريې دا دوستي ومنله معسود ډير خوشحاله و، د كوزدې مراسم تر سره سول ګوتمي (چله ) په ګوته سوې.
*************
د پوليسو د مشر لپاره دا پېښه مشكوكه وه، وې غوښتل تر څو نوري څېړني هم وكړي او موضوع معلومه كړي.
پوليس د پيښي ځاي ته ولاړل.
(كېداي سي د خوا ګرځېدو په وخت كې د پله څخه لاندي ولېدلې وي)
(خو هغې كولي سواي چې د پله پرسرخوا وګرځوي)

پوليسو خپل جاسوسان د معسود كلي ته ولېږل ترڅو د دوي په اړه زيات معلومات راټول كړي.په راپورونوكې وويل سول چې د معسود مېرمن د خپل پلار او مور اصلي لور نه وه.
خو د هغې مور او پلار ويل كه مو دا اصلي لور نوه خوهغه مو كوچيني لويه كړې وه او تر خپلي اصلي لور مو هم زياته مينه ورسره كوله.
پوليسو د معسود خوښينه د پوښتنولپاره ماموريت ته وغوښتله.
(د معسود ژوند د خپلي مېرمني سره څنګه و؟)
( هغوي خوشحاله ول او په خوشحالي سره يې ژوند كاوه)
( او اوس به ته په خوشحالي ورسره ژوند وكړي! كه څنګه؟)
****************
كه څه هم دې د معسود سره د واده كولو لېولتيا نه درلوده د پوليسو دې بدګمانيو نوره هم پښيمانه كړه او دا دوستي يې فسخه كړه.
معسود چې له دې خبرې خبر سو ډېر خوابدي سو او د خپلي خوښينې ليدو ته ورغي.
(آيا دا ريـښتيا ده؟)
( هو زه نه غواړم چې ستا سره واده وكړم)

(نه داسي نسي كېداي موږ خو د كوزدې مراسم هم تر سره كړل او ګوتمي (چلې) مو هم په ګوته كړې.)
(هو خو هغه چله مې وغورځوله،زه نه سم كولي چې د خپلي خور ځاي ونيسم،او نه هم د پوليسو دا خبري زغملي سم.)
معسود ډېر پريشانه و او داسي ښكارېدي چې هرڅه يې له لاسه وركړي وي،په مشكل سره يې خبروته خوله جوړه كړه.
(ګوره ته داسي نه سې كولي..... زما لور تا ته اړتيا لري)
(هغه خو هسي هم زه په خپل كور كې روزم)
(نو زه به څه كوم؟ زه هم تا ته اړتيا لرم.......ځكه زه ستاسره ډيره مينه كوم.)
(خو زه ستا سره مينه نه كوم)............................
(ګوره ما څه وه چې ستا لپاره مې ونه كړل،................ زه نه غواړم چې تا له لاسه وركړم...........ځكه خو مې هغه دېوال چې زما او ستا تر منځ و له منځه يووړ، حتٰى خپل راتلونكى زوي هم.
(څه!....... كوم دېوال ؟.....آيا......آيا تا؟)
( هو ما ستا سره ډيره مينه درلوده او لرم يې، له دې كبله مې خپله مېرمن له منځه يوړله،دا يوازنې لاره وه چې تا تر لاسه كړم)
( څه تا زما خور و وژله!...... آه خدايه............)

د معسود خوښينې له دې موضوع څخه پوليس خبر كړل معسود ونيول سو،د ځان د ژغورني لپاره يې هيڅ كومه لاره نوه پاته نو په خپل جرم يې اعتراف وكړ،هغه په خپله ژبه وويل چې خپله مېرمنه له پله څخه لاندي وغورځوله او وې وژله................ پر معسود باندي د اعدام حكم عملي سواو په خپله سزا ورسېد