میرویس جلالزی
په داسي حال کې چې په تیره یوه اونۍ کې څه باندي لس تنه په کندز کې تښتول شوي او پولیس وایې چې د هغوي د موندلو لپاره عملیات روان دي خو تر اوسه د یوه د خلاصون څرک هم ندی لګیدلی.
تقریباً لس ورځي دمخه یو جاپانی خبریال له کندز څخه وتښتول شو چې تر اوسه یې د مړې اوژوندي په اړه معلومات ندي تر لاسه شوي.
له دغې پیښې وروسته د ملګرو ملتونو ۵ افغان کارکونکي له کندز څخه وتښتول شول چې تر اوس د هغو برخلیک هم ندی روښانه .
په دغه پیښه پسې په تعقیب د سې شنبې په ورځ د یوه ساختماني شرکت اته تنه کارکونکي د کندز له علي آباد ولسوالۍ څخه تښتول شوي چې د هغوي برخلیک هم ناڅرګند دی.
د کندز چارواکې په داسي حال کې چې د دغو کسانو د خلاصون لپاره د هلو ځلو د پيلیدو خبرورکوي خو یو شمیر سرچینو د کندز په ولایت کې د بینوا همکار ته ویلي چې د جاپان سفارت د هغه جاپاني دخلاصون لپاره هلي ځلي په پټه توګه په لاره اچولي چې له کندز څخه تښتول شوی دی.
که څه هم سرچینې وایې چې د جاپآن سفارت د کورنیو چارو وزارت سره دغه موضوع نده شریکه کړي خو د کورنیو چارو وزارت سرچینو ویلي چې دوي د هرې هغې هڅي ستاینه کوي چې د یو چا په را خلاصیدو تمامه شي.
له کندز څخه د بینوا ویب پاڼي همکار کاږي چې د جاپآني خبریال تښتونکي طالبان نه بلکه د کندز په چهاردرو ولسوالۍ کې د یوه پر نفوذه پخواني جهادې قوماندان ملګري دي چې د انسان تښتونو په څو پیښو کې لاس لري او همدا یې کاروبار دی.
ویل کیږي چې دغه خبریال د همدغه قوماندان له کسانو سره بندي دی خو دا نده معلومه چې په کوم ځای کې یې ساتي.
د سرچینې په حواله چې دغه جګړه مار قوماندان د خبریال د خلاصون لپاره له سفارتي چارواکوسره د موبایل تلیفون له لارې اړیکې نیولي او د هغه د خلاصون لپاره یې د څه باندي دوه سوه زره امریکایې ډالرو غوښتنه کړي چې سفارتي چارواکو تر اوسه نده منلي.
