هسپانيا د روان کال د اکټوبر له ۳۱مې وړاندې خپل پاتې عسکر له افغانستانه وباسي

د هسپانیا دولت اعلان کړی چې په افغانستان کې پاتې هسپانوي عسکر به د روان کال د اکټوبر له ۳۱ وړاندې له دغه هېواده ووځي. د هسپانوي رسنیو د راپور له مخې دولت ویلي چې په افغانستان کې د هسپانوي عسکرو د۱۴ کلن ماموریت پای ته لږ وخت پاتې دي. د اعلان له مخې به ۴۲۰ هسپانوي پوځیان چې په هرات کې مېشت وو له افغانستانه ووځي؛ خو ۲۰ پوځي افسران به په کابل کې د غوڅ ملاتړ په عمومي قوماندانۍ کې د روان کال تر پایه پورې پاتې شي. هسپانیا د افغان ماموریت پر مهال ټول ۹۹ سرتېري له لاسه ورکړي دي.