مرسته     |     دپاڼي نقشه     |     ننوتل

هسته نېستي



زه په شپه كي د تيارې پر اوږو راغلم
بې آوازه د خوبونو په ګامونو
نه غوږونه مي له ږغ سره آشنا سول
نه مي نښي چا ليدلي دي د پلونو
د شبنم په څير د لمر سره پناه سوم
له نامه سره مي تن زرې زرې سو
آيينه مي سوه له ځانه سره وركه
له نېستۍ مي نوم ښاغلى د شغلې سو
نه د نور نه د تيارې په مذهب پوه سوم
نه ملګرى مي آواز د قافلې سو
لكه اوښكه د باڼو پر ګودر راغلم
څاڅكي تن مي نيمه خوا شومه د شپې سو
چي منلى نه زمان او نه مكان يم
زه به ولي پوروړى د آسمان يم
نه په لوري نه منزل يم پوهيدلى
لكه ژرنده په خپل ځان كي سر ګردان يم
څه منت راباندى پاته د قلم دى
كه ازل يم كه اجل يمه د ځان يم
ګوره چا په دې نامه يم نومولى
كم ازل تر دې ګرېوان يم را ايستلى
بي اختياره يې راكړي څو شېبې دي
د قلم جبر په ژوند يمه منلى
لكه نه وم يوه ورځ به داسي نه يم
نه تيارو ته نه شغلو ته به په زړه يم

ويرجينيا
2004/6/4






Answer Machine : + 1 (518) 5577770   --   USA Tel : +1 20 38 202020   --   AFG Tel : + 93 (786) 909000  --   Director Email : khalid_hadi@hotmail.com   --   Editor Email : rahila.jawad@gmail.com
Benawa.com    Copyright ©   2004-2018   All Rights Reserved     Powered by:Benawa Network     Design by: Khalid Hadi Hiadery