مرسته     |     دپاڼي نقشه     |     ننوتل

په اورونو کې سندرې

د روح سپېڅلى زور
د هيلو شونډو کې مې پاڼې بياثمر نيسي
پس له کلونو مې ګلونه بيا ګودر نيسي

زه يو سېلاب شومه د اوښکو او سړو اسوېلو
دى راته لار کې د سپېرو شګو سنګر نيسي

دا چې شمله يې راټيټېږي نه، جګېږي پسې
دا خو پرې خداى(ج) د خپلې مينې خپل وزر نيسي

پرون يې سر کې وه نشه د فرعونيت د فکر
نن راته خړې خړې ګوري ځان اوتر نيسي

دا خو د روح سپېڅلى زور دى د خداى(ج) عشق وينځلى
په يوه وړانګه چې د ټول تورتم لښکر نيسي

بيا د نازو بچيو وتړلې تورې تر ملا
چا د ګورګين د مرګ ويل چا وې شيبر نيسي.

١٣٧٦/٣/٦
کابل

د شعر پري
د ښکلا سيمه شپې نيولې ځانته ښار جوړوي
د ژوند په هر واټ کې د دار له پاسه دار جوړوي

موږه د لمر وږمې شهيدې کړې د شپې په کاڼو
اوس مو له کلي پټ تېرېږي بله لار جوړوي

ما ځنګوي د تيارو څڼو کې د خداى(ج) په نامه
ځانته د ژوند په نوم يو ښکلى سپين سهار جوړوي

ربه د تا په نوم مې ژوند اخلي په خپله ګټه
د وخت واکمن څومره هوښيار دى څه ښه کار جوړوي

کله د ښو په نوم قربان کله د بدو په نوم
دا فرښتې څومره په سخته زما بار جوړوي

د شعر پري مې مروره شوه د شعر له روحه
سپينې خبرې دې له شعر ځنې شعار جوړوي.

١٣٧٥ل کال
کابل

سندريزه وږمه
د ژوند په هر فصل مې ځي راځي غميزه وږمه
د زړه په پاڼو کې مې رپي دا دوديزه وږمه

زه د ورېښمو د رباب تارو ته خوب کومه
جانان مې خيال باندې راشيندي اوسپنيزه وږمه

شهيده وړانګه يم د خپلو ستورو شپو وژلې
زړه کې مې بله ده د خپل غشي اوريزه وږمه

د ژوندون هر واټ کې مو جوړ دى وژنځاى د ګلو
لکه بيرغ پرې باندې رپي ارمانيزه وږمه

موږه غاټول زړونه قربان کړل په همدې هيله چې:
د ساندو کلي کې به راشي سندريزه وږمه

شمله زړه، پوړنى زوړ دى، منګى زوړ دى خو هم
څومره خوږه خوږه ترې اوري پتمنيزه وږمه

د جنګ اسونو مې د دښتو ګلان ټول ستړي کړل
خدايه يو ځل خو پرې خوره کړې سوله ييزه وږمه.

١٣٧٦ل کال د غويي ٢٦مه
کابل

د شعر حجاب
د ژوند مړاوې سندره مې رباب کې راولم
د ويښو شپو کيسه د عشق کتاب کې راولم

دا سر ربه! مات شوى دى، ټيټ شوى چاته نه دى
خو تاته يې پنځه وخته محراب کې راولم

نن بيا د غزا ډول د هندوکش په سر غږېږي
سپېرې طالبې څڼې مې په تاب کې راولم

د نقد ملايان ګرځي له دُرو سره په ښار کې
د شعر پېغله مې ځکه په حجاب کې راولم

زما تړلي لاس وو ستا درنې درنې څپېړې
يو وخت خو به اشنا دا په حساب کې راولم

د سره قهر غلامه بيا د چا غېږې ته درومې!
د سپينو وړانګو تاو به په کولاب کې راولم

خندا موسکۍ موسکۍ شي چې پر شونډو د کبانو
يو شور خو د سندرو په درياب کې راولم

په دې به هم د ډېرو له زړګو شي لمبه تاوه
دا وران د زړه وطن چې نغمه باب کې راولم.

١٣٧٥ل کال د کب ١٧مه
لغمان

Answer Machine : + 1 (518) 5577770   --   USA Tel : +1 20 38 202020   --   AFG Tel : + 93 (786) 909000  --   Director Email : khalid_hadi@hotmail.com   --   Editor Email : rahila.jawad@gmail.com
Benawa.com    Copyright ©   2004-2018   All Rights Reserved     Powered by:Benawa Network     Design by: Khalid Hadi Hiadery