الف) التباسونه او ګډوډۍ

د تپل سوي � معياري � پښتو پلويانو د پراخو جعل سوو کليمو او نامنلو معيارونو په وړاندي کولو سره، زموږ په اسانه، ساده او خوږه ژبه کي ډېر التباسونه او ګډوډۍ پيدا کړي دي . د پښتو ژبي په وينګ( ويلو ) او کښنګ ( کښلو )کي دې ناوړه لاس وهنو، نه يوازي بهرنييانو ته پښتو ژبه تر بلي هري ژبي لانجمنه کړې ده؛ بلکي موږ پښتنو ته يې هم د خپلي مورنۍ او پلرنۍ ژبي په پوهېدو کي لوی خنډونه او ربړونه پېښ کړي دي . په ژبه کي دا ناسم او خپلسري تصرفات، د پښتو ژبي د ودي او پرمختګ پر ځای، د هغې د بې خوندۍ او وروسته پاته والي شرايط او موجبات برابروي . د پښتو ژبي تکړه ليکوال او څېړونکي، ښاغلي محمد معصوم هوتک، په هغه مستنده او مستدله ليکنه کي، چي � پرمعياري ژبه دمعيارپه ژبه يوه څېړنه � نوميږي، د دغه راز التباسونو او ګډوډييو په اړه اوږدې خبري کړي دي ( ګران لوستونکي کولای سي د ښاغلي هوتک علمي او تحقيقي ليکنه پرکتابي ډول سربېره ، د اينټرنيټ له لاري د بېنوا ويبپاڼي د برېښنايي کتابتون په برخه کي هم ولولي ) . له دې امله په دې ليکنه کي هڅه کوو، چي د دغه راز التباسونو او ګډوډييو د لا روښانتيا په هيله د ځينو نورو بولګو په راوړولو سره بسنه وکړو .