دنازو انا یاد
احمد تکل
د چا بدل
انا ټټر دې څيرې
انا د کور له دالانو نه دې لمبې جګېږي
انا منګي کې د ملالې کوم چا زهر ګډ کړل
او دا خبره نه ده
ګوره ډوډۍ کې دې کوم لاس دى چې رانجه ګډوي
چې ستا اواز د خونړۍ پېړۍ د غبرګو دېوالونو له شا
ماته را ونه رسي
انا دا څه پېښ شوي...
چې پښتانه لمسيان دې
له يخدانو کليمه دارې مشهدي پټوي
او د مغولو په بازار کې يې په نيمه، نيمه بيه پلوري
انا دا څه پېښ شوي
چې د جرګو کړۍ کې
د ښو درنو درنو خبرو پر ځاى
سپکې کنځلې کېږي
انا دا څه پېښ شوي
چا درته ښېرې کړې دې؟
الله د چا بدل له تانه اخلي؟
