په افغانستان کې د اولسمشرۍ دلومړنيو ازادو ټاکنو د پايلو د اعلان په وياړ
د ٢٠٠٤ ز.کال د نوامبر شپږمه
جرمني ، د کولن ښار
په اروپا کې د افغاني کلتوري ټولنو ګډه جرګه ، په افغانستان کې د اولسمشرۍ د لومړنيو ازادو او ديموکراتيکو ټولټاکنو د پايلو د اعلان له امله د خوښۍ د څرګندولو په لړ کې ، لومړني افغان منتخب اولسمشر ښاغلي حامد کرزي ته د دغو ټولټاکنو د ګټلو له امله مبارکي وايي او په راتلونکو پنځو کلونو کې يې جنګ ځپلي او ټوپک ځپلي افغانستان ته د خدمت په ﻻره کې د برياليتوب هيلې کوي .
د مبارکۍ د دغو مراتبو په څنګ کې ، په اروپا کې د افغاني کلتوري ټولنو ګډه جرګه ، دغو ټکو ته په جدي توګه د ښاغلي اولسمشر پام رااړوي :
١_ موږ په دې نظر يو چې له دې وروسته منتخب اولسمشر د يو لړ بنسټيزو او زړورو ګامونو اخيستلو ته اړتيا لري . پياوړې اولسمشري او پياوړی او يو ﻻس حکومت د يو پياوړي هېواد د ځواکمنۍ نښه ده . سترې ملي هڅې ، سترو پرېکړو ته ضرورت لري. تر اوسه پورې د افغانستان حالات داسې وو چې د ځينو مهمو ملي ګامونو په اوچتولو کې هم له ناکامه او د وطن د حالاتو په پام کې ساتلو سره ، د محافظه کارۍ تر حده ځنډ شوی دی، خو له دې وروسته کورني حالات ، د ټولټاکنو بريالۍ پای ته رسېدنه او د نړيوالې ټولنې غوڅ ملاتړ ، د دې لاره هواره کړې ده چې اولسمشر د پياوړو او زړورو ملي ګامونو په اوچتولو کې له ځنډ او تعلل څخه کار وانخلي . د افغان اولس بشپړ ملاتړ او د نړيوالې ټولنې هر اړخيز حمايت ، هغه ته دا توان ورکوي چې نور پرېکنده ګامونه واخلي .
٢_ لکه چې ښاغلي کرزي د خپلې انتخاباتي مبارزې په پيل کې ويلي دي او بيا بيا يې ټينګار پرې کړی دی ، موږ له دوی څخه په درنښت ، خو په کلکه غوښتنه کوو چې له ځينو معلوم الحاله کړيو او کسانو سره چې په افغانستان کې د جنګ او جنګسالارۍ نښې دي ، که د هر نوم تر نقاب لاندې وي ،ائتلافي حکومت جوړ نه کړي . د ملې مشارکت په بهير کې د افغانستان د ټول اولس متخصص ، د کار اهل او ملي کسان چې د يو واحد پروګرام پلي کولو ته ژمن وي، د نوي افغان ملي حکومت په ترکيب کې سره يو ځای کړي ، او د تېرې کابينې هغه څېرې په کې بيا راغونډې نه کړي چې د دغو دريو کلونو د اساسي ناکامۍ عوامل او د ټوپکسالارۍ عاملين دي .
_ موږ هيله لرو چې د اداري فساد، د ترورېزم او جنګسالارۍ، مخدره موادو او نورو بدمرغيو په وړاندې مبارزه ،يوازې او يوازې د يوې سالمې ملي ادارې په جوړېدو سره په غوڅه توګه تر سره کېدای شي .
_ د پارلماني ټاکنو له پيل مخکې دې د جنګ سالارۍ ټول مدعيان پر خپلو ځايونو کښېنول شي ، که نه پارلماني ټاکنې او وروسته پارلماني اولسواکې هلې ځلې د دوی په وسيله له سترو خنډونو سره مخامخ کېدای شي .
زموږ په نظر،اولس خپل اولسمشر ته په ډېر ملي اخلاص خپلې رايې ورکړې ، پر هغه يې بشپړ باور وکړ ، اوس نو د اولسمشر وار دی چې خپلو ژمنو او د خپل اولس هيلو ته څه ځواب ورکوي !؟ دا به خبرې نه ، عمل جوت کړي .
په درنښت
_ افغاني کلتوري ټولنه / هالنډ
_ د افغانستان د فرهنګ ټولنه / ډنمارک
_ د افغانستان د کلتوري ودې ټولنه / جرمني
_ د افغانستان د بيا ودانولو د مرستې ټولنه / اتريش
_ د افغانستان د تفاهم او مرستې ټولنه / بلجيم
_ د خپلواکۍ فرهنګي مرکز او خپرونه / ډنمارک
_ د افغان سينما او تياتر مرکز / جرمني
