کابل : د ليندۍ ٣٠ ، ١٣٨٣
د افغانستان د خوست ولايت د کيسه ليکوال ګل حسين مجاهد د لنډو کيسو ټولګه (( وروستۍ ليدنه )) د خوست د خپلواکې فرهنګي ټولنې له خوا چاپ شوې ده .
دغه ټولګه د خوست د والي معراج الدين پټان په شخصي پيسو چاپ شوې . د يادونې وړ ده چې ښاغلی پټان خپله هم له ادبياتو سره مينه لري او يو وخت يې ليکنې هم کړي دي .
په کابل کې د پښتو داستاني اثارو لوستونکي او ليکونکي په دې باور دي چې دغه ټولګه د خوست له ولايت څخه د کوم کيسه ليکوال لومړنۍ مجموعه ده . د روان کال په ترڅ کې د خوست ولايت د يوۀ زلمي ليکوال ، قاسم عارف ، ناول (( سمندري باغيان )) هم چاپ شوی و .
د ارواښاد اکادميسين صديق روهي او تکړه شاعر پير محمد کاروان څخه وروسته اوس د خوست له ولايت څخه په پرله پسې توګه د ليکوالانو او شاعرانو نومونه اوريدل کيږي چې د ادبياتو په ډګر کې د پام وړ خدمتونه کوي .
