و ښاغلي عبدالجبار نعيمي ته د مبارکې پيغام
د افغانستان اسلامي جمهوريت د جمهور رئيس د فرمان له مخي پخواني سفارتکار، په لويه جرګه کې د خلګو ټاکل سوي وکيل او په پاکستان کې د ښاغلي حامد کرزي د انتخاباتي کمپاين مشر، ښاغلي عبدالجبار نعيمي د ارواښاد حاجي محمد نعيم زوي د افغانستان د وردګ ولايت د والي په توګه مقرر سو.
ښاغلي عبدالجبار نعيمي د پاکستان په مرکز اسلام آباد کې د افغانستان د لوي سفير د دوهم سکرتر دنده تر سره کول چي و افغان کډوالو سره يې ډيري مرستي کړي او افغان کډوال ډيري ښي خاطري ځيني لري.
وروسته د اساسي قانون په په لويه جرګه کې نوموړي د خپلي ښي روئي او و خلګو ته د ځانګړي پاملرني له مخي د کندهار د ولايت د پنجوائي ولسوالي وکيل په توګه بي له مقابلي وټاکل سو.
د ٢٠٠٤ ز کال په ټولټاکنه کې نوموړي په پاکستان کې د ښاغلي حامد کرزي د انتخاباتي کمپاين مشر په توګه وګمارل سو چي نوموړي کمپاين په ډيره اعلي توګه مخ ته يووړ.
په اسلام آباد پاکستان کې ميشته کډوال او د افغانستان ټول ولس ده څخه د وطن د آبادي او سوکالي لپاره د ښه خدمت هيله لري.
په پاي کې د خواخوږي ادبي او کلتوري ټولني ټول غړي ده ته خپل د زړه له کومي مبارکي وړاندي کوي او د لوي څښتن تعالي له درباره د ده برياليتوب غوښتونکي دي.
په درنښت،
د خواخوږي ادبي او کلتوري ټولني مطبوعاتي څانګه
