پرېشانه ولولې
دښاغلي خيال محمد کټوازي د شعري ټولګي نوم دی چي په دې وروستيو کي په کابل کښي د ميوند کتاب خپرولو موسسې له خوا په ١٥٠ مخونو کښي چاپ شوی دی .
ښاغلي کټوازي د کتاب په يادونه کښي وايي چي په دې کتاب کښي يې ځيني هغه شعرونه هم شته کوم چي ددوی په مخکنۍ شعري ټولګه ( د رڼا بهير ) کښي چاپ شوي وو ، د رڼا بهير د اوس نه ديارلس کاله پخوا له چاپه راوتلی و .
ښاغلی کټوازی بل ځای ليکي چي ددې کتاب ( پرېشانه لولې ) ډير شعرونه يې په زندان کښي ليکلي دي .
نوموړي په افغانستان کي بېلابېلي دولتي دندي تر سره کړې دې چي له هغوی نه يې د بېلګي په توګه په ١٣٥٨ لمريز کال کي د اطلاعات او کلتور د وزير په توګه ټاکنه يادولای شو .
ښاغلی کټوازی د ١٣٥٨ لمريز کال د جدي پر شپږمه د شوروي اتحاد د يرغل سره سم د اطلاعات او کلتور د وزارت له دندي ګوښه او د شوروي اتحاد د يرغلګرو تر وتلو پوري په زنداني کړای شو .
نوموړی اوس په هالنډ کي اوسيږي .
پرېشانه ولولې په دې شعر سره پيل کيږي :
قرباني
په غبرګو زولنو کې د اختيار سره درځم
ستا غيږې ته مرګيه له ايثار سره درځم
نوبت ته دې ولاړ يمه د نېل حريصه روده
لږ صبر راته وکړه له سينګار سره درځم
زما د زړه له کومې د منصور اروا ته وايه
مزار ته دې په غاړه کې له دار سره درځم
دحق ادا کول خو قرباني د ځوانۍ غواړي
ارمانه صدقې ته له مزار سره درځم
پيرو ، د پروانې ته د اورونو لوبه څه ده
د ميني ازمويښت ته له انګار سره درځم
خزان مې په ګلزار د ارزوګانو باندي راغی
فرياد ته به ماتمه له بهار سره درځم
پيالې مي پورته کړي د وطن د عشق له ميو
د سر په پيمانه کي له خمار سره درځم
ستا توره او قلم مي مشالونه د سفر دي
دربار ته دي خوشاله له ټينګار سره درځم
( کامران دې وي وطن او ککرۍ دې زما نظر )
دننګ د بيړۍ نوحه له تلوار سره درځم
د زړه د وينو رنګ مي د سينې ټپونه سپړي
يو ګل د پسرلي يم له پرهار سره درځم
د (خيال ) په تصور کي د وطن د الهام ناوې
سلام ته دې د عشق له افتخار سره درځم
