د افغانستان د نومیالی فرهنګیال استاد ف .فضلی د ناڅاپي مړینې له امله
په ډنمارک کې د افغانستان د علمی – فرهنګی خدمتونو مرکز (خپلواکۍ ) د خواخوږۍ پیغام
په ډېرې خواشینۍ سره مو خبر ترلاسه کړ چې د افغانستان د تیاتر او تمثیل پخوانی، مجرب، نومیالی او مسلکی شخصیت استاد ف . فضلی د۸۴ کالو په عمر له دې فاني نړۍ څخه د تل لپاره سترګې پټې کړې او په حق ورسېد.
(اناالله و انا الیه راجعون )
ارواښاد استاد فضلی د کندهار په هنر پروره خاوره کې وزېږېد،لومړنۍ زده کړې او تنکي ځلمیتوب یې د خپلې کورنۍ تر ملاتړ لاندې په هماغه ښار کې ترسره کړ،له ماشومتوب څخه یې له تمثیل او نورو هنري چارو سره ځانګړې مینه درلوده.ځوان قضلي د کندهار او شا او خوا سیمو په هنري او ادي کړیو کې د یو مطرح لوبغاړی په توګه سر پورته کړ او له هنر سره يې سارې مینې د کابل ښار ته په کډه کړ او د افغانستان راډیو د تیاتر او تمثیل له لومړنیو بنسټ ایښودونکو څخه د یو تن فعال هنرمند په توګه څرګند شو. استاد ف . فضلي په نه ستړي کیدونکي توګه د پښتو تیاتر او سینما لومړني علمی او مسلکی امکانات برابر کړل ،شپه او ورځ یې پر ځان یوه کړه او د کابل تیاتر ،افغان تیاتر ،افغان نندارې ،کابل رادیو ، د افغانستان راډیو ،د افغانستان تلویزیون،افغانفلم او کابل نندارې له لارې د پښتو هنر او تیاتر د لوړتیا او پیاوړتیا لپاره نه هیرېدونکي خدمتونه وکړل ،هغه د پښتو ډرام ،ډیالوک ،پښتو تمثیل اوپښتو فلمونو لومړني معاصر بنسټونه کېښودل او دا هغه وخت وو چې پښتو دغه شان یوه تشه په خپلې هنري برخه کې احساسوله.ارواښاد استاد فضلی دغه تشه ،دغه اړتیا،دغه غوښتنه او دغه هیله ترسره کړه .په سلګونو ډرامونه یې ولیکل،په سلګونو داستانونه ،پرله پسې راډیویي داستانونه یې وکښل ،لنډې کیسې یې ولیکلې ،نظمونه یې ډرامونو او داستانونو ته جوړ کړل ،په زرګونو درامونه او داستانونه یې پرودیوس کړل ،بې شمېره تمثیلي ټوټې یې ولیکلې او هغه یې ډایرکټ کړې ،په سلګونو تیاترونه او د تمثیل صحنې د هغه په استادانه هنرې لوبو او تمثیل ښایسته شوې ،په سلګونو شاګرادان یې وروزل ،او پښتو تیاتر او تمثیل یې له سیالانو سره سیال کړ..استاد ف . قضلی پښتو تیاتر ته عمومیت ورکړ ،خلک او اولس یې ورسره لا پسې بلد کړل ،پښتو تیاتر یې په خپلو هنری سفرونو سره ګاونډیو هیوادو او نړېوالو ته وروپېژاند او د ټول افغانستان په کچه یې پښتو تیاتر او ډرام ته د لوړتیا او درنښت مقام ور په برخه کړ.استاد فضلي یوه اړتیا وه ،استاد فضلی د افغان اولس د دردونو،رنځونو ،کړاوونو،بې وزلیو،دغه راز د افغان ملت د برم او بریو هینداره وه.استاد فضلی هغه شمعه وه چې د نورو د روښانتیا لپاره بله شوې وه،خپله وسوځېده ،خو جهان یې روښانه کړ.هغه د تیاتر صحنه د افغان ملت د سرلوړیو صحنه ګرځولې وه .هغه زموږ د ملت ترانې وویلې ،هغه د انسان سندره وبولله ،هغه د پوهې نغارې وغږولې ،هغه د مینې او پیوستون ډیوې بلې کړې .استاد د پښتو تیاتر او تمثیل ستوری و،روښانه ستوری ،داسې ښکلی چې رڼا یې زموږ د لارو لارښود او د یو هوسا ،سرلوړي ،ښاد ، اوبسیا ژوند زیری راوړونکی ،دغه ستوری ولوید،زموږ جهان په بل مخ شو،هنر مو بې استاده شو،خدایه ته صبر راکړې ،او استاد فضلی په خپل کرم سره وبښې او ښه جنتونه ورپه برخه کړې .
په ډنمارک کې د افغانستان د علمي – فرهنګی خدمتونو مرکز ( خپلواکۍ ) ټول کارکوونکي او مینه وال ،د استاد فضلی مړینه د افغانستان فرهنګ ته یوه نه جبران کېدونکې پېښه ګڼي او په دې توګه د استاد فضلی کورنۍ ،دهغه ملګرو،د هغه همکارانو، د استاد شاګردانو او ټول افغان ملت ته د زړه له کومې
دتسلیت او خواخوږۍ مراتب وړاندې کوی
په ډنمارک کې د افغانستان د علمي – فرهنګي خدمتونو مرکز ( خپلواکۍ ) په استازیتوب
او د ارواښاد استاد فضلي د ۲۵ کالو شاګرد محمد یوسف هېواددوست
