٢٣-٢-١٣٨٤ کابل
چې لوند د خپلو اوښكو په شبنم و يو سړى
والله چې له ګلابه سره سم و يو سړى
ورځ تېره نه وي، اوونۍ نه وي اوښتې چې د هېواد د يوه پېژندوى او نوماند انسان مړينه مو د يوې ژورې خواشينۍ په كنده كې لاهو كوي.
په علامه بابا پسې مو د فضل محمد فضلي، جان محمد پلار، عبدالجليل وجدي، ميرزا علم حميدي او... د مړينې خبرونه واورېدل، چې په هېواد كې دننه او بهر يې ټول ليكوالان او شاعران ودردول، ځكه چې زموږ په ګومان په اوس مهال كې دا هره يوه څېره مشخص بديل نه لري، دا په داسې حال كې چې ګران هېواد مو د يو ډول كلتوري ښكېلاك په منګولو كې ساه اخلي او ډېر كلتوري ارزښتونه مو له ستر ګواښ سره مخ دي، موږ خو د همدغو سرلارو مشرانو او كلتورپالو اشخاصو په لارښوونو او همكارۍ د كار لپاره ملا تړله. چې الله خو مو دې نور نه دردوي.
په اروپا كې مېشت ليكوالان او كلتورپال اشخاص د استاد جان محمد پلار او استادفضل محمد فضلي په ياد غونډه جوړوي، چې د هوسۍ مجلې اداره د دوى دا نېك اقدام ستايي، په نړۍ او اخرت ورته اجرونه غواړي.
د يو موټي، سرلوړي او ودان افغانستان په هيله
سرلوړي واوسئ
د هوسۍ مجلې اداره
كابل- افغانستان
