٢٤ غويی ١٣٨٤ -
د ارواښاد فضلي او ارواښاد پلار
د مړينې او وير غونډې په مناسبت
٢٠٠٥ ، د می ١٤
جرمني ، د کولن ښار
د روان کال د ثور ( غوايي) مياشتې له موږه داسې دوه درانه ممثلين ، ليکوال او هنرمندان واخيستل چې د خپل ژوندانه اوږده کلونه يې د هېواد د تمثيل د هنر د ودې په لاره کې پرله پسې هلو ځلو ته ځانګړې کړي وو او د هنر له لارې يې د افغاني ټولنې د ناخوالو ، نيمګړتياوو او نادودو پر وړاندې اوږده او نه ستړې کېدونکې مبارزه کړې ده . په دې توګه دواړو له موږه تلليو هنرمندانو د افغاني ټولنې په رابيدارولو کې ونډه لرلې او د ټولنيزو بدمرغيو په له منځه وړلو کې يې د سپيڅلي هنر له لارې برخه اخيستې ده .
اوس چې دغه دواړه نوميالي هنرمندان ، مرګي له موږه اخيستي دي، د هغوی د ياد ژوندي ساتل او د هغوی د هنري برياوو يادونه زموږ دنده ده . د خوښۍ ځای دی چې په نيدرلنډ ( هالنډ ) کې افغاني کلتوري ټولنې د دغو نامتو هنرمندانو په ياد د يوې درنې غونډې د جوړولو تابيا کړې ده ، د ټولنې دا کار د پوره ستاينې او زموږ او د افغانستان د کلتوري او هنري ودې د ټولو مينه والو د ملاتړ وړ دی .
د دې غونډې په جوړولو کې ستاسو د برياليتوب غوښتونکي يو او د هنر د هغو درنو ارواښادو استادانو له کورنيو ، دوستانو او ټولو افغانو هنروالو او هنرپالو سره ځانونه د هغوی د مرګي په ماتم کې شريکوو .
د افغانستان د کلتوري ودې ټولنې
د مشرتابه جرګه
