لومړی فرانسوي – پښتو قاموس په پاريس کې له چاپه راووت. دا قاموس چې نېژدې شل زره لغتونه لري د پوهاند ډاکټر اکبر وردګ او د فرانسې د ختيځو ژبو او مدنيتونو د ملي انستيتوت د استاد ښاغلي کبير حبيب په زيار جوړ شوی دی. د لغاتو برخه يې ٥١٦ مخه دي او ورسره په ٢٢ مخو کې ښاغلي دانيل ستفون په فرانسوي ژبه د پښتو د ګرامر لنډيز او په ٩ مخونو کې نجيب منلي په پښتو ژبه د فرانسوي ګرامر په هکله لنډ معلومات ليکلي دي چې په توګه د کتاب ضخامت له پينځه نيم سوو مخو اوړي.
دا خورا ارزښتمن قاموس د Asiatheque خپرندويې ټولنې له خوا چاپ شوی او د مالي لګښت يوه برخه يې د فرانسې د کلتور وزارت او يو شمېر علمي موسسو په غاړه اخيستې ده،
ښاغلو اکبر وردګ او کبير حبيب په ١٩٩٩ کال کې د همدغې خپرندويې ټولنې له لارې پښتو-فرانسوي قاموس (١٣٠٠٠ لغتونه) چاپ کړی و.
د بېنوا فرهنګي ټولنه د دغو خورا ارزښتمنو کتابونو ليکوالو ته او خپرندويې ټولنې ته د فرانسوي-پښتو قاموس د چاپېدو له امله د زړه له کومي مبارکي وايي او د لانورو برياليتوبونو هيله يې کوي.
Dictionnaire Français – Pashto
فرانسوي – پښتو قاموس
Habib Kabir, Wardag Akbar
Langues & Monde
L’Asiathèque
ISBN : 2 – 9155255 – 05 – 9
info@asiatheque.com
www.asiatheque.com
د پلور بيه : ١٩ يورو
