دخپریدو نیټه : 2005-08-03 مخپرونکئ : 039 - دبېنوا اداره - کابل
له ډنمارک څخه دخواخوږی پیغام
محمد یوسف هېواددوست
په خواشینۍ سره مو دا خبر ترلاسه کړ چې د افغانستان نومیالی فرهنګیال استاد حبیب الله تږي د روانې میاشتې پر دویمه نېټه له دې نړۍ څخه سترګې پټې کړي
( لوی خدای دې ښه جنتونه ور په برخه کړي )
استاد حبیب الله تږی د معاصر افغانستان د خورا غوره تاریخپوه ، آرینپوه ، ژبپوه ،د پښتو ژبې پښویه پوه ، او د اوسني پښتو ادب د څېړنیزې او تخلیقي برخې کارنده او نومیالي لیکوال په توګه د افغاني ادب او تاریخ په لوړتیایي بهیر کې د سترې ونډې اخیستنې له امله تلپاتې ستوری بلل کیږي .
په ډنمارک او سکندناوي هېوادو کې یو زیات شمېر اوسیدونکي افغانان او فرهنګیان او د استاد تږي شاګردان د هغه مړینه د افغانستان د فرهنګ سترې ټولنې لپاره یوه نه جبران کېدونکې پېښه ګڼي او د استاد تږي له کورنۍ ،دوستانو ،ملګرو ، شاګردانو او د ټول افغانستان د کلتوراو تاریخپوهنې د لارې مخکښانو او لارویانوته د تسلیت ژور مراتب وړاندې کوي .
موږ هیله لرو چې د افغانستان دولت او په ځانګړې توګه د افغانستان د اطلاعاتو او کلتور وزارت ، د کابل پوهنتون ،د افغانستان د علومو اکاډمۍ ،د افغانستان د لیکوالو ټولنه او نورې اړونده څانګې د ارواښاد استاد حبیب الله تږي د آثارو په راټولو ، بیا چاپ او خپرولو کې اړین ګامونه پورته کړي .
اروا یې ښاده او یاد یې تلپاتې .
په ډنمارک کې د افغانستان د علمي او فرهنګي خدمتونو مرکز په استازیتوب
محمد یوسف هېواددوست
