کوپنهاګن –۲۲/۱۱/۲۰۰۵
په افغانستان کې د هېواد د تاریخي آثارو د غلا ، تالان ،او غیر قانونی پلټنو او څېړنو له امله د خپلواکۍ د فرهنګی مرکز اعتراض لیک
په ډېرې خواشینۍ سره په پرله پسې توګه خبرتیاوې ترلاسه کوو چې په دې وروستیو څلورو کالو کې ،له کله نه چې په اصطلاح د قانون حاکمیت افغانستان ته راغلی د ټول هېواد په کچه د افغانستان تاریخي آثار یو په بل پسې دلوټمارانو، غلو ، داړه مارانو ،قاچاق وړونکو او سیمه ایز دلالانو له خوا چې زیاتره یې له دولت سره نږدې اړیکي لري ،غلا کیږي او د یوې منظمې شبکې له لارې نه یوازې په هېواد کې دننه چې له هېواد نه د باندې او په ځانګړې توګه ګاونډیو هېوادو کې لاس پر لاس کیږي.د کابل ښار او د ټول هېواد موزیمونه خو د ۱۹۹۲ کال نه وروسته د تنظیمی جګړه مارانو لخوا په پرله پسې توګه ، لوت او تالان شول چې د دغو بې شمېره آثارو د موندلو او بیا خوندي کولو هېڅ څرک تر اوسه ندی لګېدلی ، خو دا اوس په دې څلورو کالو کې په ټول هېواد کې قاچاقچیان او د تاریخي آثارو غله په ډاډه زړه او ان کله خو د دولتي ملاتړ کوونکوتر سیوري او ملاتړ لاندې دلته او هلته غیر قانوني کیندنې کوي ،آثار راسپړي او په ځینو ځایونو کې خو تاریخي آثار وران او ځمکه یې توپکسالارانو او د دولت لوړپوړو چارواکو ته وېشل شوې چې دغه د (( قهرمانان))! پکې خپلو بچیانو ته ماڼۍ ګانې جوړې کړی !؟ د دغه شان یرغل یوه بېلګه هم د کابل ښار د شیرپور کلا ده چې د امیر دوست محمد خان په وخت کې جوړه شوې وه اود یو روایت له مخې په همدغه ځای کې پر خپلواکۍ مینو افغانانو د یرغلګر انګریز استازی میکناټن مړ ، کړ . دا دی اوس د نادرخان د تپې د شا او خوا د آثارو غیر قانوني پلتنې او د ( بًست کلا ) چور او تالان اورو .دا ټول په ډاګه څرګندوي چې د افغانستان د اسلامي جمهوریت د ولسمشر سلا کاران ، د اطلاعاتو او فرهنګ وزارت چارواکي او د ولایتونو والیان په دې ټولو برخو کې ګرم دي .که ښاغلی حامد کرزی خپلو وزیرانو ته امر کوي چې خلکو ته خپل حساب او کتاب ورکړي ( چې هېڅکله به هم دا کار و نه کړي ) ،د ملت غوښتنه دا ده چې یو ځل دې پخپله د دغه شان حساب او کتاب لپاره د خپل هغه ولس غوښتنو ته ځوابونه ورکړي چې د هغوی د رایو له برکته دا دی د ولسمشر تر لقبه ورسېد .موږ پوره باور لرو چې دغه شان درک په دوي کې شته او له همدې امله موږ مخامخ ولسمشر ته مراجعه کوو او ورڅخه غواړو چې د خپل هېواد د تاریخ او فرهنګ شتمنۍ دې له دغو بې بندو بارټوپکیانو ، غلو او قاچاقبرانو څخه وساتي .
په درنښت
له ډنمارک څخه د خپلواکۍ د فرهنګي مرکز په استازیتوب
محمد یوسف هېواددوست
