۱۳۹۲کال د تلې ۲۳ مه نېټه
په ډيرې ژورې خواشينۍ سره مو خبر ترلاسه کړ، چې د سولې او ثبات دښمنانو د لوګر والي ښاغلی ارسلا جمال هغه مهال په يوه ترورستي بريد کې په شهادت ورساوه، چې نن سهار يې د لوی اختر د لمانځه له ادا کولو وروسته د لوګر ولايت مرکز د پل عالم په جامع جومات کې لوګريانو ته وينا کوله
انالله و انا اليه راجعون.
شهيد ارسلا جمال له نن څخه پوره اته څلوېښت کاله وړاندې د پکتيکا ولايت په يوسف خېلو ولسوالۍ کې د فاني نړۍ ته سترګې غړولي وې، ارواښاد ارسلا جمال خپلې لوړې زده کړې د ماليزيا په هېواد کې ترسره کړي وې او دوه کاله د خوست ولايت د والي په توګه هم پاتې شوی وو. ارواښاد ارسلا جمال نږدې اته مياشتې وړاندې د ولسمشر لخوا د لوګر ولايت لپاره د نوي والي په توګه وټاکل شو.
ارواښاد ارسلا جمال په هېواد مين او يو خدمتګار شخص وو، د نوموړي شهادت نه يوازې پکتيکاوالو او لوګريانو ته، بلکې ټولو هېوادوالو ته يوه ستره او نه جبرانېدونکي ضايعه ده، زه د پکتيکا د والي په توګه د ارواښاد ارسلا جمال د شهادت له امله د هېواد ولسمشر جلاالتماب حامد کرزي، د سيمه ييزو ارګانونو خپلواکې ادارې مشرتابه، د لوګر او پکتيکا ولايتونو مجاهد ولس او ټولو هېوادوالو ته د خواخوږۍ او ډاډګيرنې مراتب وړاندې کوم، ارواښاد ته د لوی خدای ج څخه د فردوس جنت او کورنۍ ته يې د جميل صبر غوښتنه کوم
روح دې يې تل ښاد وي
د پکتيکا والي
